సంగారెడ్డి జిల్లా కొండాపూర్ మల్కాపూర్ గ్రామంలో ప్రజల ఆరోగ్య రక్షణను లక్ష్యంగా పెట్టుకుని సర్పంచ్ మామిడిపల్లి అనిల్ కుమార్ ఆధ్వర్యంలో పారిశుద్ధ్య కార్యక్రమాలు ముమ్మరంగా కొనసాగుతున్నాయి. వర్షాకాలం నేపథ్యంలో డెంగ్యూ, మలేరియా వంటి సీజనల్ వ్యాధులు వ్యాప్తి చెందకుండా గ్రామంలోని ప్రతి వార్డులో ప్రత్యేక పర్యటనలు నిర్వహిస్తూ లీకేజీలు, ఓపెన్ డ్రైనేజీలు, నీటి నిల్వలను గుర్తించి వెంటనే చర్యలు చేపడుతున్నారు. లీకేజీ బోర్ల మరమ్మతులు, పాడైన డ్రైనేజీల పునర్నిర్మాణం, నిల్వ నీటి తొలగింపు, దోమల నివారణ చర్యలను వేగవంతం చేశారు. ఈ సందర్భంగా సర్పంచ్ అనిల్ కుమార్ మాట్లాడుతూ ప్రజల ఆరోగ్య రక్షణే తమ ప్రధాన లక్ష్యమని, గ్రామంలో ఎక్కడైనా పారిశుద్ధ్య సమస్యలు లేదా నీటి నిల్వలు కనిపిస్తే వెంటనే పంచాయతీకి సమాచారం అందించాలని కోరారు. పరిశుభ్రమైన గ్రామం నిర్మాణంలో ప్రతి ఒక్కరూ భాగస్వాములు కావాలని పిలుపునిచ్చారు. గ్రామ ప్రజల ఆరోగ్యం, భద్రత కోసం చేపడుతున్న ఈ చర్యలను గ్రామస్తులు అభినందిస్తుండగా, ఉపసర్పంచ్, వార్డు సభ్యులు, పారిశుద్ధ్య సిబ్బంది, గ్రామ ప్రజలు కార్యక్రమంలో పాల్గొన్నారు.