అయూబ్‌నగర్‌లో భారీ నష్టం.. తృటిలో తప్పిన ప్రాణాపాయం

చిట్యాల, నల్గొండ జిల్లా:

నల్గొండ జిల్లా చిట్యాల మున్సిపాలిటీ రెండో వార్డులోని అయూబ్‌నగర్ కాలనీలో గురువారం భారీ వేపచెట్టు కూలి ఇంటిపై పడడంతో తీవ్ర నష్టం సంభవించింది. కాలనీకి చెందిన షేక్ గౌస్ నివాస గృహంపై ఒక్కసారిగా చెట్టు విరిగి పడటంతో ఇంటి పైకప్పు, గోడలు దెబ్బతిన్నాయి. ఇంట్లోని గృహోపకరణాలు కూడా ధ్వంసమైనట్లు సమాచారం.

ఘటన సమయంలో కుటుంబ సభ్యులు ఇంట్లోనే ఉన్నప్పటికీ ఎలాంటి ప్రాణనష్టం జరగకపోవడం ఊరటనిచ్చింది. అయితే చెట్టు కూలిన ప్రభావంతో ఇంటి ఒక భాగం పూర్తిగా దెబ్బతిని కుటుంబం తీవ్ర ఆందోళనకు గురైంది.

స్థానికులు తెలిపిన వివరాల ప్రకారం, వర్షాలు, ఈదురుగాలుల కారణంగా బలహీనపడిన వేపచెట్టు అకస్మాత్తుగా కూలిపోయిందన్నారు. సమాచారం అందుకున్న స్థానిక ప్రజాప్రతినిధులు, మున్సిపల్ సిబ్బంది సంఘటన స్థలాన్ని పరిశీలించి నష్టాన్ని అంచనా వేశారు.

ప్రభుత్వం, మున్సిపల్ అధికారులు స్పందించి బాధిత కుటుంబానికి తక్షణ ఆర్థిక సహాయం అందించాలని కాలనీవాసులు కోరుతున్నారు. ఘటనతో అయూబ్‌నగర్ కాలనీలో కొంతసేపు భయాందోళన నెలకొంది.