నల్గొండ టౌన్,

ఒకప్పుడు మెదడు కణితి (బ్రెయిన్ ట్యూమర్) చికిత్స కోసం హైదరాబాద్‌ వంటి మహానగరాలకు పరుగులు తీయాల్సిన పరిస్థితి ఉండేదని, ఇప్పుడు అదే స్థాయి అత్యాధునిక వైద్య సేవలు నల్గొండలోనే అందుబాటులోకి వచ్చాయని ఐకాన్ ఆస్పత్రి వైద్యులు తెలిపారు. నల్గొండ పట్టణంలోని ఐకాన్ ఆస్పత్రి 100వ బ్రెయిన్ ట్యూమర్ శస్త్రచికిత్సను విజయవంతంగా పూర్తి చేసి మరో మైలురాయిని చేరుకుంది.

ఆస్పత్రిలో ఇప్పటివరకు నిర్వహించిన 100 మెదడు కణితుల శస్త్రచికిత్సల్లో సాధారణ కేసులతో పాటు అత్యంత క్లిష్టమైన, ప్రాణాపాయ స్థితిలో ఉన్న కేసులను కూడా విజయవంతంగా నిర్వహించినట్లు వైద్య బృందం వెల్లడించింది. శస్త్రచికిత్స అనంతరం రోగులు ఆరోగ్యంగా కోలుకుని డిశ్చార్జ్ కావడం విశేషమన్నారు.

హైదరాబాద్‌లో ఇలాంటి చికిత్సలకు లక్షల రూపాయల ఖర్చు అవుతుండగా, నల్గొండలోనే తక్కువ వ్యయంతో నాణ్యమైన వైద్య సేవలు అందిస్తున్నామని తెలిపారు. గ్రామీణ, పట్టణ ప్రాంతాల మధ్య ఉన్న వైద్య అసమానతలను తగ్గించడమే తమ ప్రధాన లక్ష్యమని పేర్కొన్నారు.

అత్యాధునిక పరికరాలు, ఆధునిక ఆపరేషన్ థియేటర్లు, నిపుణులైన వైద్య బృందం సహకారంతో ఈ విజయాన్ని సాధించినట్లు తెలిపారు. ప్రొఫెసర్ రాజేష్, డాక్టర్ శశాంక్ కోడ, డాక్టర్ సాయి మౌనికి చెరుకూరి, డాక్టర్ సాయి లావణ్య కడిమి నేతృత్వంలోని న్యూరో సర్జరీ, క్రిటికల్ కేర్ బృందం సేవలను ప్రశంసించారు.

100 కేసులు.. 100 కుటుంబాల్లో కొత్త ఆశ

ప్రతి విజయవంతమైన శస్త్రచికిత్స వెనుక ఒక కుటుంబం తిరిగి ఆశను పొందిందని వైద్యులు పేర్కొన్నారు. కుటుంబ సభ్యుల వద్దకు తిరిగి చేరిన తల్లులు, బాధ్యతలను పునఃప్రారంభించిన తండ్రులు, తమ భవిష్యత్తును తిరిగి నిర్మించుకునే అవకాశాన్ని పొందిన యువతతో ఈ 100 కేసులు కేవలం సంఖ్య కాదని, 100 కుటుంబాలకు పునర్జన్మ లాంటి ఆనందాన్ని అందించిన ఘట్టమని తెలిపారు.

ఈ సందర్భంగా తమపై విశ్వాసం ఉంచిన రోగులు, వారి కుటుంబ సభ్యులు, నల్గొండ ప్రజలు, వైద్య సిబ్బందికి ఐకాన్ ఆస్పత్రి యాజమాన్యం కృతజ్ఞతలు తెలిపింది. భవిష్యత్తులో మరింత అధునాతన న్యూరో సర్జరీ సేవలు, అత్యవసర మెదడు, వెన్నుపూస చికిత్సలను అత్యున్నత ప్రమాణాలతో అందించేందుకు కృషి చేస్తామని వెల్లడించింది.