అస్వస్థతకు గురైన విద్యార్థులు, రైతులు.. యాజమాన్యంపై చర్యలు కోరుతున్న స్థానికులు

నల్గొండ జిల్లా చిట్యాల మండలం పెరపల్లి సమీపంలోని వియాస్ ఫార్మా కంపెనీలో రసాయన పదార్థం (కెమికల్) లీకైన ఘటన స్థానికంగా ఆందోళనకు దారితీసింది. కంపెనీ పరిసర ప్రాంతాల్లో వ్యాపించిన దుర్వాసనతో పెరపల్లి నుంచి వెలిమినేడు వైపు వెళ్లే విద్యార్థులు, రైతులు పలువురు అస్వస్థతకు గురైనట్లు సమాచారం.

సోమవారం ఉదయం జరిగిన ఈ ఘటనతో స్థానికులు భయాందోళనకు గురయ్యారు. కెమికల్ వాసన కారణంగా కొందరికి కళ్ల మంట, శ్వాస తీసుకోవడంలో ఇబ్బందులు, తలనొప్పి వంటి సమస్యలు ఎదురైనట్లు గ్రామస్తులు చెబుతున్నారు. విషయం తెలుసుకున్న స్థానికులు సంఘటనా స్థలానికి చేరుకుని తీవ్ర ఆగ్రహం వ్యక్తం చేశారు.

ప్రమాదకర రసాయనాల నిర్వహణలో కంపెనీ యాజమాన్యం నిర్లక్ష్యం వహించిందని ఆరోపించిన గ్రామస్తులు, ఘటనపై సమగ్ర విచారణ చేపట్టి బాధ్యులపై కఠిన చర్యలు తీసుకోవాలని డిమాండ్ చేశారు. అలాగే పరిశ్రమల వల్ల ప్రజల ఆరోగ్యానికి ముప్పు వాటిల్లకుండా కాలుష్య నియంత్రణ మండలి, సంబంధిత అధికారులు తక్షణ చర్యలు చేపట్టాలని కోరారు.

ఘటనపై అధికారిక వివరాలు ఇంకా వెలువడాల్సి ఉండగా, బాధితుల ఆరోగ్య పరిస్థితి, కెమికల్ లీకేజీకి గల కారణాలపై అధికారులు ఆరా తీస్తున్నట్లు తెలిసింది. ఈ ఘటనతో పెరపల్లి పరిసర ప్రాంతాల్లో మరోసారి పరిశ్రమల భద్రతా ప్రమాణాలపై చర్చ మొదలైంది.