సంగారెడ్డి జిల్లా ఝరాసంఘం మండల పరిధిలోని గంగాపూర్ గ్రామం కొత్త పంచాయతీగా ఏర్పడి అనేక సంవత్సరాలు గడిచినప్పటికీ, ఇప్పటివరకు గ్రామంలో రేషన్ దుకాణం ఏర్పాటు చేయకపోవడంతో గ్రామ ప్రజలు తీవ్ర ఇబ్బందులు ఎదుర్కొంటున్నారు. ప్రభుత్వం పేదల కోసం అందిస్తున్న రేషన్ బియ్యం మరియు ఇతర నిత్యావసర సరుకులను పొందడానికి గ్రామస్థులు సమీపంలోని టేకూర్, ధర్మపూర్ తదితర గ్రామాలకు వెళ్లాల్సి వస్తోంది.రేషన్ సరుకులు తీసుకురావడానికి దూర ప్రాంతాలకు వెళ్లాల్సి రావడంతో ముఖ్యంగా వృద్ధులు, మహిళలు, దివ్యాంగులు తీవ్రంగా ఇబ్బందులు పడుతున్నారు. రవాణా సౌకర్యాలు కూడా సరైన విధంగా లేకపోవడంతో కొందరు ప్రజలు రోజంతా సమయం వెచ్చించి రేషన్ తీసుకురావాల్సిన పరిస్థితి ఏర్పడుతోంది. దీంతో చాలా మంది ప్రజలు తమకు లభించాల్సిన రేషన్ సరుకులను కూడా సకాలంలో పొందలేకపోతున్నారని గ్రామస్థులు ఆవేదన వ్యక్తం చేస్తున్నారు.గంగాపూర్ గ్రామం పంచాయతీగా ఏర్పడిన తర్వాత కూడా మౌలిక సదుపాయాలు పూర్తిగా కల్పించకపోవడం పట్ల ప్రజలు అసంతృప్తి వ్యక్తం చేస్తున్నారు. గ్రామంలోనే రేషన్ దుకాణం ఏర్పాటు చేస్తే ప్రజలకు ఎంతో సౌకర్యంగా ఉండడమే కాకుండా ప్రభుత్వం అందిస్తున్న సంక్షేమ పథకాల ప్రయోజనం సకాలంలో అందుతుందని వారు చెబుతున్నారు.కాబట్టి సంబంధిత అధికారులు మరియు ప్రభుత్వం వెంటనే స్పందించి గంగాపూర్ గ్రామంలో ప్రత్యేకంగా రేషన్ దుకాణం ఏర్పాటు చేసి గ్రామ ప్రజలకు అవసరమైన సౌకర్యాలు కల్పించాలని గ్రామస్థులు కోరుతున్నారు. అలాగే పేద ప్రజల ఇబ్బందులను దృష్టిలో ఉంచుకొని త్వరితగతిన చర్యలు తీసుకోవాలని వారు విజ్ఞప్తి చేస్తున్నారు.