జిల్లా యువజన మరియు క్రీడా కార్యాలయం ఆధ్వర్యంలో నిర్వహించిన సి.ఎం. కప్ జిల్లా స్థాయి క్రీడా పోటీలలో విజయం సాధించిన క్రీడాకారులు రాష్ట్ర స్థాయిలో కూడా అద్భుత ప్రతిభ కనబరిచి మొదటి, రెండవ, మూడవ స్థానాలను సాధించారు. ఈ క్రీడాకారుల విజయాలను గుర్తిస్తూ జిల్లా కలెక్టర్ వారిని ఘనంగా సన్మానించారు.జిల్లాకు ప్రాతినిధ్యం వహిస్తూ క్రీడా రంగంలో విశేషంగా రాణించిన మొత్తం 75 మంది క్రీడాకారులను కలెక్టర్ అభినందించారు. విభిన్న క్రీడా విభాగాల్లో జిల్లాకి చెందిన క్రీడాకారులు అత్యుత్తమ ప్రతిభను ప్రదర్శించారు. ముఖ్యంగా బాలబాలికల ఆటల విభాగంలో 24 మంది పాల్గొని రాష్ట్ర స్థాయిలో మెరిసిన ప్రదర్శన కనబరిచారు.రెజ్లింగ్‌లో 4 మంది, ఈతలో 5 మంది, కిక్‌బాక్సింగ్‌లో 6 మంది, వు షు 13 మంది, జిమ్నాస్టిక్స్‌లో 1, యోగా విభాగంలో 1, బాక్సింగ్‌లో 2 మంది, బాల్ బాడ్మింటన్‌లో 3 మంది, పవర్ లిఫ్టింగ్‌లో 1, కరాటేలో 5, బాడ్మింటన్‌లో 4, తైక్వాండోలో 6, క్యారమ్‌లో 2 మంది క్రీడాకారులు రాష్ట్ర స్థాయి విజయాలను సాధించారు. ఈ ప్రతిభతో వారు తమ కృషి, నిబద్ధత మరియు ధైర్యాన్ని ప్రదర్శించి స్థానాలను సంపాదించారు.జిల్లా కలెక్టర్ మాట్లాడుతూ, క్రీడా రంగంలో జిల్లాకు ఇది గర్వకారణం అని పేర్కొన్నారు. రాష్ట్ర స్థాయి పోటీల్లో మెరిసిన యువ క్రీడాకారులు భవిష్యత్తులో దేశ స్థాయిలో కూడా విజయాలు సాధించాలని,ప్రభుత్వం అందిస్తున్న సౌకర్యాలను ఉపయోగించి మరింత ఎదగాలని ఆయన ఆశాభావం వ్యక్తం చేశారు. క్రీడాకారులు సాధించిన విజయాలు వారి కృషి ఫలితమే కాక, తల్లిదండ్రులు,కోచ్‌లు పెట్టిన శ్రమకు కూడా ఫలితంగా అని తెలిపారు.భవిష్యత్తులో మరిన్ని విజయాలు సాధించాలని కలెక్టర్ ఆకాంక్షించారు.ఈ కార్యక్రమంలో జిల్లా యువజన మరియు క్రీడా శాఖ అధికారి టి. అఖిలేష్ రెడ్డి మరియు సిబ్బంది కూడా పాల్గొన్నారు.