రామన్నపేట, సకాలంలో డిగ్రీ పూర్తి చేయలేకపోయిన విద్యార్థులకు మహాత్మా గాంధీ విశ్వవిద్యాలయం ప్రత్యేక సువర్ణావకాశం కల్పించింది. 2010–11 విద్యా సంవత్సరం నుంచి పాత విధానం (ఇయర్‌వైజ్) లేదా నూతన విధానం (సెమిస్టర్)లో డిగ్రీ చదివి వివిధ కారణాల వల్ల పూర్తి చేయలేకపోయిన వారికి ఈ అవకాశం వర్తిస్తుందని రామన్నపేట ప్రభుత్వ డిగ్రీ కళాశాల అధికారులు తెలిపారు.

కళాశాల ప్రిన్సిపల్ ఆచార్య డాక్టర్ రాహత్ ఖానం, అకాడమిక్ కోఆర్డినేటర్ డాక్టర్ జె. చిన్నబాబు సోమవారం విడుదల చేసిన ప్రకటనలో పేర్కొన్నారు. డిగ్రీ చదివి బ్యాక్‌లాగ్ పేపర్లు మిగిలిన విద్యార్థులు ఈ చివరి అవకాశాన్ని వినియోగించుకుని తమ డిగ్రీని పూర్తిచేసుకోవాలని కోరారు.

పరీక్ష ఫీజు చెల్లించేందుకు మార్చి 4 (04-03-2026)ను చివరి తేదీగా నిర్ణయించినట్లు తెలిపారు. అర్హులైన విద్యార్థులు ఆలస్యం చేయకుండా కళాశాలను సంప్రదించి పూర్తి వివరాలు తెలుసుకుని దరఖాస్తు చేసుకోవాలని సూచించారు.