అలం ఆటకు పోటెత్తిన భక్తజనం

సూర్యాపేట మున్సిపాలిటీ పరిధిలోని పిల్లలమర్రి గ్రామంలో కుల మతాలకు అతీతంగా మొహరం వేడుకలు ఘనంగా జరుగుతున్నాయి. హిందూ, ముస్లిం సోదరభావానికి ప్రతీకగా ప్రతి ఏడాది నిర్వహించే ఈ వేడుకల్లో ఈసారి కూడా గ్రామ ప్రజలు భారీ సంఖ్యలో పాల్గొంటున్నారు.

ముఖ్యంగా రాత్రి వేళ నిర్వహించే అలం ఆట ప్రత్యేక ఆకర్షణగా నిలుస్తోంది. అలం ఆడే కార్యక్రమాన్ని తిలకించేందుకు పిల్లలమర్రి గ్రామం ప్రజలు పెద్ద ఎత్తున తరలివస్తున్నారు. డప్పుల మోగింపు, సంప్రదాయ వాయిద్యాల నడుమ అలం ఊరేగింపు భక్తి పారవశ్యాన్ని కలిగిస్తోంది.

గ్రామంలోని యువకులు, పెద్దలు, మహిళలు కలిసి మొహరం ఏర్పాట్లలో చురుకుగా పాల్గొంటున్నారు. ఎలాంటి అవాంఛనీయ సంఘటనలు జరగకుండా నిర్వాహకులు ప్రత్యేక జాగ్రత్తలు తీసుకుంటున్నారు.

ఈ సందర్భంగా గ్రామ పెద్దలు మాట్లాడుతూ, మొహరం వేడుకలు మత సామరస్యానికి ప్రతీకగా నిలుస్తున్నాయని, అందరూ కలిసిమెలిసి పండుగను జరుపుకోవడం ఆనందదాయకమని తెలిపారు. పిల్లలమర్రిలో దశాబ్దాలుగా కొనసాగుతున్న ఈ సంప్రదాయం భవిష్యత్ తరాలకు ఆదర్శంగా నిలుస్తుందని పేర్కొన్నారు.