పారిశుద్ధ్యంపై ప్రత్యేక దృష్టి పెట్టాలి..

విధుల్లో నిర్లక్ష్యం వహిస్తే కఠిన చర్యలు తప్పవు..

వైద్యారోగ్య శాఖ సమీక్షలో జిల్లా కలెక్టర్ బి. చంద్రశేఖర్ హెచ్చరిక..

​నల్గొండ : వర్షాకాలం ముంచుకొస్తున్న నేపథ్యంలో జిల్లాలో డెంగ్యూ, మలేరియా, చికున్‌గున్యా, వైరల్ జ్వరాలు వంటి సీజనల్ వ్యాధులు ప్రబలకుండా ముందస్తు నివారణ చర్యలు చేపట్టాలని జిల్లా కలెక్టర్ బి. చంద్రశేఖర్ వైద్యాధికారులను ఆదేశించారు. గురువారం కలెక్టరేట్ సమావేశ మందిరంలో వైద్యారోగ్య శాఖ, మెడికల్ కాలేజీ, ప్రాథమిక ఆరోగ్య కేంద్రాలు (పీహెచ్‌సీలు), ఏరియా ఆసుపత్రుల పనితీరు, మౌలిక సదుపాయాలపై ఆయన సుదీర్ఘ సమీక్ష నిర్వహించారు. ఈ సందర్భంగా కలెక్టర్ మాట్లాడుతూ, రానున్న రోజుల్లో వాతావరణ మార్పుల వల్ల దోమల వ్యాప్తి పెరిగే ప్రమాదం ఉందని, గ్రామాలు, పట్టణాల్లో పారిశుద్ధ్య కార్యక్రమాలను యుద్ధప్రాతిపదికన చేపట్టాలని స్పష్టం చేశారు.

క్షేత్రస్థాయిలో నిరంతర పర్యవేక్షణ ​

బాధిత వర్గాలపై ప్రత్యేక శ్రద్ధ..

పిల్లలు, గర్భిణీలు, వృద్ధుల ఆరోగ్యంపై వైద్య సిబ్బంది ప్రత్యేక దృష్టి సారించాలి. ఆశా వర్కర్లు, ఏఎన్ఎంలు, పారామెడికల్ సిబ్బంది క్షేత్రస్థాయిలో నిరంతరం పర్యటించి, జ్వర పీడితులను గుర్తించి వెంటనే వైద్య కేంద్రాలకు తరలించాలని కలెక్టర్ ఆదేశించారు. జిల్లాలోని అన్ని పీహెచ్‌సీల్లో డెంగ్యూ, మలేరియా నిర్ధారణ కిట్లను తగినంత సంఖ్యలో అందుబాటులో ఉంచాలని, గ్రామసభల ద్వారా ప్రజల్లో చైతన్యం తీసుకురావాలన్నారు. రైస్ మిల్లులు, పరిశ్రమల్లో పనిచేసే కార్మికులకు దోమల నివారణ, వ్యక్తిగత పరిశుభ్రతపై అవగాహన కల్పించాలి. ముఖ్యంగా పట్టణ స్లమ్ ప్రాంతాలపై ప్రత్యేక నిఘా ఉంచి, రోజువారీ నివేదికలు సమర్పించాలి.

పెండింగ్ పనులకు కాలపరిమితి..

​వైద్య ఆరోగ్య రంగంలో మౌలిక సదుపాయాల కల్పనకు ప్రభుత్వం ప్రాధాన్యత ఇస్తోందని కలెక్టర్ తెలిపారు. సబ్ సెంటర్లలో మిగిలి ఉన్న నిర్మాణ పనులను నాణ్యతా ప్రమాణాలతో పూర్తి చేసి, ఈ నెలాఖరు లోగా అందుబాటులోకి తీసుకురావాలని ఆదేశించారు. జిల్లా ప్రభుత్వ ఆసుపత్రి, డీ-అడిక్షన్ సెంటర్, టీచింగ్ హాస్టళ్లలో పెండింగ్‌ పనులను త్వరితగతిన పూర్తి చేయాలన్నారు. ప్రభుత్వ ఆసుపత్రులకు వచ్చే గర్భిణీలకు మెరుగైన వైద్య సేవలు అందించడంతో పాటు, సాధ్యమైనంత వరకు సాధారణ ప్రసవాలు (నార్మల్ డెలివరీలు) అయ్యేలా ప్రోత్సహించాలని కలెక్టర్ సూచించారు.

ప్రత్యేక వ్యాక్సినేషన్ డ్రైవ్..

జూన్ 14, 15 తేదీల్లో కళాశాలల్లో నిర్వహించ తలపెట్టిన హెచ్‌పీవీ (HPV) వ్యాక్సినేషన్ ప్రత్యేక కార్యక్రమాన్ని వంద శాతం విజయవంతం చేయాలని పిలుపునిచ్చారు. ఎన్జీఓల సహకారంతో హెచ్ఐవీ/ఎయిడ్స్ నియంత్రణ అవగాహన కార్యక్రమాలు చేపట్టాలని, క్షయవ్యాధి (టీబీ) నిర్ధారణ కోసం విస్తృత స్థాయిలో స్క్రీనింగ్ పరీక్షలు నిర్వహించాలని పేర్కొన్నారు.

సకాలంలో రాకుంటే చర్యలు..

​ప్రభుత్వ వైద్యులు, సిబ్బంది విధులకు సకాలంలో హాజరుకావాలని, బయోమెట్రిక్ హాజరును కచ్చితంగా అమలు చేయాలని కలెక్టర్ హెచ్చరించారు. ఆసుపత్రుల్లో పారిశుద్ధ్యం, విద్యుత్ సరఫరా లోపాలు లేకుండా చూసుకోవాలన్నారు. విధుల్లో నిర్లక్ష్యం వహిస్తే కఠిన చర్యలు ఉంటాయని హెచ్చరించారు. అలాగే, పెండింగ్‌లో ఉన్న మెడికల్ రీయింబర్స్‌మెంట్ దరఖాస్తులను వెంటనే పరిష్కరించాలని అధికారులను ఆదేశించారు. ఈ సమీక్షా సమావేశం సందర్భంగా క్షయవ్యాధి (టీబీ) నివారణపై ప్రజల్లో అవగాహన కల్పించేందుకు రూపొందించిన ప్రత్యేక గోడ పత్రికను (పోస్టర్) కలెక్టర్ ఆవిష్కరించారు. ఈ సమావేశంలో జిల్లా వైద్యారోగ్య శాఖ అధికారి శ్రీనివాస్, మెడికల్ కాలేజ్ ప్రిన్సిపల్ సత్యనారాయణ, డీసీహెచ్ఓ మాతృనాయక్, జిల్లా ప్రభుత్వ ప్రధాన ఆసుపత్రి సూపరింటిండెంట్ నేత నరసింహారావు తదితర వైద్య అధికారులు పాల్గొన్నారు