​పవన్ ఏపీ అభివృద్ధిపై దృష్టి పెట్టాలి తెలంగాణలో విద్వేషాలు వద్దు..

ధాన్యం సేకరణకు కేంద్రం సహకరించడం లేదు..

విలేకరుల తోటి చిట్‌చాట్‌లో మండలి చైర్మన్‌ గుత్తా సుఖేందర్ రెడ్డి..

​నల్గొండ : తెలంగాణ ఆవిర్భావ వేడుకలు ఘనంగా జరుగుతున్న ప్రస్తుత తరుణంలో జనసేన అధినేత పవన్ కళ్యాణ్ సభ నిర్వహించడం సరైన సమయం కాదని రాష్ట్ర శాసన మండలి చైర్మన్ గుత్తా సుఖేందర్ రెడ్డి వ్యాఖ్యానించారు. గురువారం నల్గొండలోని తన క్యాంపు కార్యాలయంలో ఆయన మీడియాతో చిట్‌చాట్ నిర్వహించారు. ఈ సందర్భంగా పలు రాజకీయ, సమకాలీన అంశాలపై ఆయన తన అభిప్రాయాలను పంచుకున్నారు.

​గుత్తా సుఖేందర్ రెడ్డి మాట్లాడిన ముఖ్యాంశాలు..

అమరావతిలోనే పాలకుల నివాసాలు ఉండాలి ఆంధ్రప్రదేశ్ రాజధాని అమరావతి బ్రహ్మాండమైన రాజధాని అని చంద్రబాబు నాయుడు, కూటమి నేతలు చెబుతున్నారని గుత్తా గుర్తుచేశారు. అలాంటప్పుడు ఏపీ ముఖ్యమంత్రి, ఉప ముఖ్యమంత్రి, మంత్రులంతా అమరావతిలోనే నివాసం ఉంటూ ఆ ప్రాంతాన్ని అభివృద్ధి చేసుకోవాలని సూచించారు. తెలంగాణతో పోలిస్తే ఆంధ్రప్రదేశ్‌కు వనరులు (సోర్సెస్) చాలా ఎక్కువ ఉన్నాయని, సుదీర్ఘ సముద్ర తీరంతో పాటు రకరకాల పోర్టులు అందుబాటులో ఉన్నాయని పేర్కొన్నారు. ఏపీ నేతలు తమ రాష్ట్ర అభివృద్ధిపైనే దృష్టి పెట్టాలి తప్ప, తెలంగాణ వైపు చూడాల్సిన అవసరం లేదన్నారు.

బాధ్యతాయుతమైన భాష ముఖ్యం..

రాజకీయాల్లో నాయకులు వాడుతున్న భాషా తీరుపై గుత్తా అసంతృప్తి వ్యక్తం చేశారు. పవన్ కళ్యాణ్ మాట్లాడుతున్న భాషా శైలి సరిగా లేదని, నాయకులు పరస్పరం దూషణలకు దిగడం ఎంతమాత్రం సమర్థనీయం కాదని హితవు పలికారు. తెలంగాణ సమాజంలో విద్వేషాలు రేకెత్తించేందుకు ఎలాంటి ప్రయత్నాలు చేయవద్దని ఆయన స్పష్టం చేశారు. రాష్ట్రంలో రైతాంగ సమస్యలు, ధాన్యం సేకరణపై మండలి చైర్మన్ సుదీర్ఘంగా మాట్లాడారు. తెలంగాణలో ఇప్పటికే 75 శాతం ధాన్యం సేకరణ పూర్తయిందని ఆయన వెల్లడించారు. అయితే ధాన్యం కొనుగోళ్ల విషయంలో కేంద్ర ప్రభుత్వం రాష్ట్రానికి ఆశించిన స్థాయిలో సహకరించడం లేదని, అందువల్లే ప్రక్రియలో కొంత ఆలస్యం జరుగుతోందని ఆరోపించారు.

​రైతులు పంట మార్పిడి వైపు ఆలోచించాలి..

మన రాష్ట్రంలో రైతులు కేవలం వరి, పత్తి పంటల వైపే మొగ్గు చూపుతున్నారు. ఒకే రకమైన పంటలు కాకుండా, రైతాంగం ఇకనైనా పంట మార్పిడి (క్రాప్ డైవర్సిఫికేషన్) వైపు దృష్టి సారించాల్సిన అవసరం ఎంతైనా ఉందన్నారు.