​ అధికారుల అనుమతి లేకుండా టెంట్లు, మైకులు ఎలా పెడతారు...?

మెజార్టీ ప్రజల మనోభావాలు దెబ్బతీసేలా వ్యవహరిస్తున్నారు

సభలకు వచ్చే వారి వివరాలు సేకరించి, రిజర్వేషన్లు రద్దు చేయాలి: హిందూ సంఘాల నేతల డిమాండ్

చౌటుప్పల్ పట్టణ కేంద్రంలోని బస్ స్టేషన్ ఆర్టీసీ ఖాళీ స్థలంలో ఎలాంటి అనుమతులు లేకుండా సువార్త మహాసభలు నిర్వహించడం మతవిద్వేషాలు రెచ్చగొట్టే విధానమేనని పలువురు హిందూ సంఘాల నేతలు తీవ్ర అభ్యంతరం వ్యక్తం చేశారు.​ఈ సందర్భంగా వారు మాట్లాడుతూ... చర్చి స్థలాలు, స్కూల్ గ్రౌండ్లు ఉన్నప్పటికీ కావాలనే కొందరు బడా నాయకుల ప్రోద్బలంతో ఆర్టీసీ ఖాళీ స్థలంలో ఈ సభలను నిర్వహిస్తున్నారని ఆరోపించారు. స్థానిక రామాలయానికి సరైన స్థలం లేనందున గతంలో సీతారాముల కళ్యాణాన్ని ఇక్కడే నిర్వహించామని, ఇప్పుడు కావాలనే అదే స్థలంలో సువార్త సభల కోసం టెంట్లు, సౌండ్ సిస్టమ్, లైటింగ్ ఏర్పాటు చేసి మెజార్టీ ప్రజలను రెచ్చగొడుతున్నారని మండిపడ్డారు.​

ట్రాఫిక్ ఇబ్బందులు పట్టవా..?

పట్టణంలో ఇప్పటికే రోడ్డు బ్రిడ్జి నిర్మాణం జరుగుతుండటంతో ప్రయాణికులు తీవ్ర ఇబ్బందులు పడుతున్నారని, ఇలాంటి సమయంలో ఇక్కడ మహాసభలు నిర్వహిస్తే పరిస్థితి ఏంటని ప్రశ్నించారు. చౌటుప్పల్ మండలం, మున్సిపాలిటీ రికార్డులలో లేని క్రైస్తవులు ఈ సభలకు ఎక్కడి నుండి వస్తున్నారో అధికారులు గమనించాలని కోరారు. బయటి ప్రాంతాల నుండి వచ్చే వారి వివరాలు సేకరించి, వారు అక్రమంగా ఏవైనా రిజర్వేషన్ ఫలాలు పొందుతుంటే వాటిని వెంటనే తొలగించాలని డిమాండ్ చేశారు.

అనుమతులు లేవన్న ఆర్టీసీ అధికారులు:

ఈ విషయమై తాము నార్కట్‌పల్లి ఆర్టీసీ డీఎం, నల్గొండ ఆర్‌ఎమ్‌లను ఫోన్ ద్వారా సంప్రదించగా... తాము సభలకు ఎలాంటి పర్మిషన్లు ఇవ్వలేదని స్పష్టం చేశారని నేతలు తెలిపారు. అధికారుల అనుమతి లేకుండా ఇక్కడ సభలు ఎలా నిర్వహిస్తారని, ఇదే విధంగా అన్ని మతాల వారు ఎలాంటి పర్మిషన్లు లేకుండా ఈ స్థలాన్ని వాడుకోవచ్చా? అని నిలదీశారు. పోలీసు, రెవెన్యూ, ఆర్టీసీ, ఎలక్ట్రిసిటీ, ఆర్‌అండ్‌బీ, మున్సిపల్ అధికారులు స్పందించి, ఇక్కడ జరుగుతున్న సభలపై పునరాలోచించాలని కోరారు.ఈ కార్యక్రమంలో

దూడల భిక్షం గౌడ్, దిండు భాస్కర్, కడారి ఐలయ్య, వంగాల రమాకాంత్, సప్పిడి లింగారెడ్డి, బక్కనగారి రోహిత్, పల్చం కిషోర్ తదితరులు పాల్గొన్నారు.