అంబేద్కర్ ఓపెన్ యూనివర్సిటీలో బీఏ కోర్సులో చేరిక.. పుస్తకాలు అందజేసిన వీసీ ఘంటా చక్రపాణి

హైదరాబాద్, జూలై 9: ‘భరత్ అనే నేను’ సినిమా ఫేం సినీ నటుడు రాహుల్ రామకృష్ణ డా. బి.ఆర్. అంబేద్కర్ సార్వత్రిక విశ్వవిద్యాలయంలో డిగ్రీ కోర్సులో చేరారు. గురువారం విశ్వవిద్యాలయానికి వచ్చిన ఆయన అడ్మిషన్ ప్రక్రియను పూర్తి చేసుకుని వైస్ ఛాన్సలర్ ప్రొ. ఘంటా చక్రపాణిను మర్యాదపూర్వకంగా కలిశారు.

ఈ సందర్భంగా వీసీ ప్రొ. ఘంటా చక్రపాణి రాహుల్ రామకృష్ణకు అభినందనలు తెలియజేసి బీఏ కోర్సుకు సంబంధించిన పుస్తకాలను అందజేశారు. అనంతరం మాట్లాడిన రాహుల్ రామకృష్ణ, ఉన్నత విద్యను పూర్తి చేయలేకపోయిన వారు, ఆర్థిక ఇబ్బందుల వల్ల చదువు మధ్యలో నిలిపివేసిన వారు, గృహిణులకు అంబేద్కర్ ఓపెన్ యూనివర్సిటీ ఒక వరమని పేర్కొన్నారు.

ఎంత డబ్బు సంపాదించినా, ఎంత పేరు ప్రఖ్యాతులు వచ్చినా విద్య మనిషికి ప్రత్యేక గుర్తింపును తీసుకువస్తుందని ఆయన అన్నారు. తాను ఇంజినీరింగ్ చదువును మధ్యలోనే నిలిపివేసినప్పటికీ, ఇప్పుడు తిరిగి విద్యాభ్యాసం కొనసాగించేందుకు అంబేద్కర్ సార్వత్రిక విశ్వవిద్యాలయంలో చేరినట్లు తెలిపారు.ఇటీవలి కాలంలో వీసీ ప్రొ. ఘంటా చక్రపాణి తీసుకుంటున్న నిర్ణయాలు తనను ఆకట్టుకున్నాయని, ఆదివాసీ తెగలు, ఆర్థికంగా వెనుకబడిన వర్గాలు, ట్రాన్స్‌జెండర్‌లకు ఉచిత విద్యను అందిస్తూ సమాన అవకాశాలు కల్పించడం అభినందనీయమని రాహుల్ రామకృష్ణ పేర్కొన్నారు.

విద్యకు వయస్సుతో సంబంధం లేదని, జీవితాంతం నేర్చుకునే ప్రక్రియ కొనసాగాలని ఆయన సందేశం ఇచ్చారు.