శ్రీ సత్యసాయి జిల్లా పర్యాటక రంగాన్ని అన్ని విధాలా అభివృద్ధి పరిచేందుకు, పర్యాటక ఆస్తులను సమర్థవంతంగా వినియోగించుకునేందుకు పటిష్టమైన చర్యలు తీసుకుంటున్నట్లు జిల్లా కలెక్టర్ ఎ. శ్యామ్ ప్రసాద్ తెలిపారు. మంగళవారం పుట్టపర్తి కలెక్టరేట్‌లోని మినీ కాన్ఫరెన్స్ హాల్‌లో ఆయన అధ్యక్షతన జిల్లా పర్యాటక మండలి (District Tourism Council - DTC) సమావేశం అత్యంత కీలకమైన చర్చలతో నిర్వహించబడింది. ఈ సందర్భంగా జిల్లాలో పర్యాటక కార్యకలాపాల ప్రోత్సాహం, మౌలిక వసతుల కల్పనపై విస్తృతంగా సమీక్షించారు.జిల్లాలోని ముఖ్య పర్యాటక ప్రాంతాలలో సందర్శకులకు మెరుగైన సౌకర్యాలు కల్పించాల్సిన అవసరం ఎంతైనా ఉందని కలెక్టర్ పేర్కొన్నారు. ఇందులో భాగంగా చారిత్రక ప్రాంతమైన లేపాక్షిలోని హరిత హోటల్‌కు తక్షణమే పెయింటింగ్ పనులు*చేపట్టి, సముచిత నిర్వహణతో పర్యాటకులకు అత్యుత్తమ సేవలు అందించాలని సంబంధిత అధికారులను ఆదేశించారు. వసతి సౌకర్యాలను శుభ్రంగా, ఆకర్షణీయంగా ఉంచాలని స్పష్టం చేశారు.జిల్లాలో ప్రస్తుతం వినియోగంలో లేని పర్యాటక శాఖ ఆస్తులను తక్షణమే గుర్తించి, వాటిని లీజ్ విధానం ద్వారా వినియోగంలోకి తీసుకురావాలని కలెక్టర్ సూచించారు. దీనివల్ల పర్యాటక శాఖకు ఆదాయ వనరులు పెరగడమే కాకుండా, స్థానిక నిరుద్యోగ యువతకు ఉపాధి అవకాశాలు లభిస్తాయని ఆయన అభిప్రాయపడ్డారు.జిల్లా సాంస్కృతిక వైభవాన్ని చాటిచెప్పేలా పెనుకొండలో “నివేదిత టీమ్” సమన్వయంతో ప్రాంతీయ వంటకాలు, సాంప్రదాయ నృత్యాలు, సంగీత కార్యక్రమాలతో కూడిన ఒక ఘనమైన ఫుడ్ ఫెస్టివల్ నిర్వహించాలనే ఆసక్తిని జిల్లా కలెక్టర్ వ్యక్తం చేశారు. ఈ ఉత్సవాలు కేవలం జిల్లా వాసులకే కాకుండా, ఇతర రాష్ట్రాల పర్యాటకులను సైతం ఆకర్షించడంలో కీలక పాత్ర పోషిస్తాయని ఆయన వివరించారు.ఈ సమావేశంలో పాల్గొన్న పలువురు ప్రైవేట్ పెట్టుబడిదారులు, పర్యాటక రంగ వ్యాపారవేత్తలు జిల్లాలో రిసార్టులు, ఈకో టూరిజం ప్రాజెక్టుల స్థాపనకు సంబంధించిన తమ వినూత్న ఆలోచనలను కలెక్టర్ దృష్టికి తీసుకెళ్లారు. ఈ ప్రతిపాదనలను అభినందించిన జిల్లా కలెక్టర్, జిల్లాలో పర్యాటకుల రాకను పెంచే ఇలాంటి ప్రాజెక్టుల అమలుకు పర్యాటక శాఖ తరఫున పూర్తి సహకారం అందిస్తామని హామీ ఇచ్చారు.

ఈ కార్యక్రమం డిఆర్‌డిఎ పిడి నరసయ్య,జిల్లా పర్యాటక మేనేజర్ ప్రతాప్ రెడ్డి ,ఇతర అధికారులు పాల్గొన్నారు.