సోమందేపల్లి:

స్థానిక మార్కెట్ రోడ్డులోని వివేకానంద ఇంగ్లీష్ మీడియం పాఠశాలలో మంగళవారం 10వ వార్షికోత్సవ వేడుకలు ఘనంగా నిర్వహించారు. ఈ సందర్భంగా చిన్నారుల నృత్యాలు, సాంస్కృతిక కార్యక్రమాలు ప్రేక్షకులను ఆకట్టుకున్నాయి.

కార్యక్రమంలో పాఠశాల హెడ్‌మిస్ట్రెస్ వనజావాణి మాట్లాడుతూ, ప్రతి విద్యార్థికి మొదటి గురువు తల్లి అయితే, రెండవ గురువు ఉపాధ్యాయులని తెలిపారు. విద్యార్థుల భవిష్యత్తును తీర్చిదిద్దడంలో గురువుల పాత్ర ఎంతో ముఖ్యమని అన్నారు.

ఈ సందర్భంగా వక్త జెక్క చంద్రా మాట్లాడుతూ, ఈ పాఠశాలలో చదివిన అనేక మంది విద్యార్థులు నేడు ఉన్నత స్థాయిలో ఉన్నారని పేర్కొన్నారు.

గ్రామ పెద్దలు, ఇతర వక్తలు మాట్లాడుతూ, ఈ పాఠశాల విద్యార్థులు క్రమశిక్షణకు ప్రతీకలని, గురువులు నేర్పిన విలువలను జీవితంలో పాటించి ఉన్నత స్థానాలకు ఎదగాలని సూచించారు. తల్లిదండ్రుల కష్టాన్ని గుర్తించి, గురువుల శ్రమకు తగిన ఫలితాలు సాధించాలని విద్యార్థులను ప్రోత్సహించారు.

అనంతరం గ్రామ పెద్దలు, పాఠశాల ఉపాధ్యాయులు మరియు ప్రతిభ కనబరిచిన విద్యార్థులను సన్మానించారు. ఈ కార్యక్రమంలో పాఠశాల కరస్పాండెంట్ రవీంద్ర, తల్లిదండ్రులు, గ్రామస్తులు తదితరులు పాల్గొన్నారు.