రొద్దం మండలం చెరుకూరు గ్రామంలో ప్రకృతి వ్యవసాయంపై అవగాహన పెంపొందించే దిశగా ప్రత్యేక శిక్షణ కార్యక్రమం నిర్వహించారు. రైతు రేగడి నరసింహప్ప పొలంలో ఏర్పాటు చేసిన ఈ కార్యక్రమంలో వ్యవసాయ మరియు ప్రకృతి వ్యవసాయ సిబ్బంది పాల్గొన్నారు.

ఈ సందర్భంగా వ్యవసాయ అధికారి రాజేష్ మాట్లాడుతూ, తక్కువ వర్షపాతం పరిస్థితులను ఎదుర్కొనేందుకు రైతులు ప్రీ-మాన్సూన్ డ్రై సోయింగ్ విధానాన్ని అనుసరించాలని సూచించారు. ఈ విధానం ద్వారా వర్షాలపై ఆధారపడకుండా ముందుగానే విత్తనం వేసి మంచి దిగుబడులు సాధించవచ్చని వివరించారు.

మండల మాస్టర్ ట్రైనర్ భార్గవ్, APCNF పరిధిలో అమలవుతున్న వివిధ సాగు నమూనాలను క్షేత్ర స్థాయిలో వివరించారు. ముఖ్యంగా Half-Moon, ATM, Dr.Pr., A-Grade మోడల్స్ ద్వారా నీటి వినియోగాన్ని తగ్గిస్తూ, పంట దిగుబడులను పెంచే మార్గాలను ప్రదర్శించారు.

ఈ కార్యక్రమంలో మండల వ్యవసాయ అధికారి జి.రాజేష్, ఏఈఓ హంసవేణి, రైతు సేవ కేంద్రం సిబ్బంది, ICRPలు మరియు ప్రకృతి వ్యవసాయ సిబ్బంది పాల్గొన్నారు.

ఈ శిక్షణతో రైతులు వర్షాభావ పరిస్థితుల్లో కూడా సమర్థవంతమైన సాగు పద్ధతులను అవలంబించేందుకు అవగాహన పొందారు.