మహాత్మా గాంధీ విశ్వవిద్యాలయం ప్రధాన గ్రంథాలయంలో ఆధునిక సాంకేతికతను వినియోగిస్తూ ఏర్పాటు చేసిన డిజిటల్ లైబ్రరీని ఉప కులపతి ఆచార్య ఖాజా అల్తాఫ్ హుస్సేన్ నేడు అధికారికంగా ప్రారంభించారు. విద్యార్థులు, పరిశోధకులు మరియు అధ్యాపకులకు ప్రపంచ స్థాయి జ్ఞాన వనరులను అందుబాటులోకి తీసుకురావడం ఈ కార్యక్రమ ప్రధాన లక్ష్యమని ఆయన తెలిపారు.

ఈ సందర్భంగా ఉప కులపతి మాట్లాడుతూ, డిజిటల్ లైబ్రరీ ద్వారా విద్యార్థులకు అంతర్జాతీయ స్థాయి పరిశోధన పత్రాలు, పుస్తకాలు, అకాడమిక్ డేటాబేస్‌లు సులభంగా అందుబాటులో ఉంటాయని పేర్కొన్నారు. గ్రంథాలయ పని వేళల్లోనే కాకుండా, ప్రత్యేకంగా డిజిటల్ లైబ్రరీ సేవలు విద్యార్థులకు అందుబాటులో ఉంటాయని తెలిపారు. ఈ అవకాశాన్ని విద్యార్థులు సద్వినియోగం చేసుకుని తమ అధ్యయనాన్ని మరింత ఉన్నత స్థాయికి తీసుకెళ్లాలని ఆయన సూచించారు. ఈ కార్యక్రమంలో భాగంగా మూడు వినూత్న కార్యక్రమాలను కూడా ఉప కులపతి ప్రవేశపెట్టారు. ఇకపై ప్రతి నెల ఒకరోజు తాను స్వయంగా గ్రంథాలయంలో విద్యార్థులతో కలిసి పఠనంలో పాల్గొంటానని ఆయన ప్రకటించారు. ఇది విద్యార్థుల్లో పఠన అలవాటును ప్రోత్సహించడంతో పాటు అధ్యయన వాతావరణాన్ని మరింత బలపరుస్తుందని తెలిపారు.

అదే విధంగా ప్రతి వారం ఒకరోజు సంబంధిత కళాశాలలో ఉదయం 10 గంటల నుంచి సాయంత్రం 5 గంటల వరకు ప్రత్యేక గ్రంథాలు, అధ్యయన వనరులను ప్రదర్శన రూపంలో అందుబాటులో ఉంచనున్నట్లు వెల్లడించారు. ఈ విధానం ద్వారా విద్యార్థులు తమ అధ్యయనానికి అవసరమైన పుస్తకాలు మరియు సమాచారాన్ని సులభంగా పొందగలరని చెప్పారు. మరో ముఖ్యమైన కార్యక్రమంగా, వివిధ కళాశాలల్లో నిర్వహించే సెమినార్లు, వర్క్‌షాప్‌లు మరియు అకాడమిక్ కార్యక్రమాల థీమ్ ఆధారంగా సంబంధిత పుస్తకాలను అదే రోజు సమావేశ ప్రాంగణంలో అందుబాటులో ఉంచనున్నట్లు తెలిపారు. ఇది విద్యార్థులలో తక్షణ అధ్యయన ఆసక్తిని పెంచి, చర్చలను మరింత లోతుగా మార్చుతుందని ఆయన అభిప్రాయపడ్డారు.

ఈ కార్యక్రమాల ద్వారా విద్యార్థుల్లో జిజ్ఞాస, పరిశోధనా దృక్పథం మరియు అధ్యయనానికి అనుకూలమైన వాతావరణం ఏర్పడుతుందని ఉప కులపతి ఆశాభావం వ్యక్తం చేశారు. ఆధునిక డిజిటల్ వనరులు విద్యార్థుల భవిష్యత్తును తీర్చిదిద్దడంలో కీలక పాత్ర పోషిస్తాయని ఆయన అన్నారు.

ఈ కార్యక్రమంలో రిజిస్ట్రార్ ఆచార్య కొప్పుల అంజిరెడ్డి, ఇన్ఫ్రాస్ట్రక్చర్ డెవలప్మెంట్ డైరెక్టర్ ఆచార్య ఆకుల రవి, డా. కె. ప్రేమ్‌సాగర్, ఇంజనీర్ శైలజ, లైబ్రేరియన్ బుచ్చి రాములు తదితరులు పాల్గొన్నారు. అలాగే అనేక మంది అధ్యాపకులు, విద్యార్థులు కూడా ఈ కార్యక్రమాన్ని వీక్షించారు. డిజిటల్ లైబ్రరీ ప్రారంభంతో విశ్వవిద్యాలయంలో విద్యా సాంకేతికత కొత్త దిశలో అడుగు వేసినట్లు భావిస్తున్నారు.