పెనుకొండ నియోజకవర్గంలోని బీసీ విద్యార్థులకు ఉన్నత విద్య అందించేందుకు ప్రభుత్వం కీలక నిర్ణయం తీసుకుంది. పరిగి, రొద్దం, సోమందేపల్లిలో కొత్తగా మూడు బీసీ హాస్టళ్లు మంజూరు చేసింది. వీటిలో పరిగి, రొద్దంలో బాలికల హాస్టళ్లు, సోమందేపల్లిలో బాలుర హాస్టల్ ఏర్పాటు కానున్నాయి. వచ్చే విద్యా సంవత్సరం నుంచే హాస్టళ్లు ప్రారంభం కానుండగా, విద్యార్థుల చేరికల కోసం జిల్లా బీసీ సంక్షేమశాఖ అధికారులు ఇప్పటికే కసరత్తు ప్రారంభించారు.

ప్రస్తుతం శ్రీ సత్యసాయి జిల్లాలో 61 బీసీ హాస్టళ్లు ఉండగా, కొత్తగా మంజూరైన మూడు హాస్టళ్లతో సంఖ్య 64కు చేరనుంది. పెనుకొండ నియోజకవర్గంలో ఇప్పటికే ఉన్న నాలుగు హాస్టళ్లకు ఇవి తోడవడంతో గ్రామీణ, పేద, వలస కూలీల పిల్లలకు విద్యా అవకాశాలు మరింత విస్తరించనున్నాయి.

కొత్త హాస్టళ్ల నిర్వహణ కోసం హెచ్‌డబ్ల్యూఓలు (వార్డెన్లు) నియామక ప్రక్రియను అధికారులు వేగవంతం చేశారు. సిబ్బంది కొరత నేపథ్యంలో ఇతర శాఖల ఉద్యోగులను డిప్యూటేషన్‌పై నియమించే అంశంపై జిల్లా కలెక్టర్‌కు ప్రతిపాదనలు పంపారు. త్వరలోనే కమిటీ ఏర్పాటు చేసి నియామకాలు పూర్తి చేయాలని అధికారులు భావిస్తున్నారు.

ఈ హాస్టళ్ల మంజూరులో రాష్ట్ర బీసీ సంక్షేమ శాఖ మంత్రి ఎస్. సవిత కీలక పాత్ర పోషించారు. పేదరికం కారణంగా బీసీ విద్యార్థులు చదువుకు దూరం కాకూడదనే ఉద్దేశంతో సీఎం చంద్రబాబునాయుడు దృష్టికి విషయం తీసుకెళ్లి హాస్టళ్లకు ఆమోదం పొందారు. విద్యార్థుల చేరికల కోసం గ్రామస్థాయిలో తల్లిదండ్రులతో మాట్లాడి అవగాహన కల్పించాలని విద్యాశాఖ అధికారులకు సూచనలు జారీ అయ్యాయి.

“బీసీ బిడ్డలకు ఉన్నత విద్య అందించడమే ప్రభుత్వ లక్ష్యం” అని మంత్రి సవిత తెలిపారు. హాస్టళ్లు, గురుకులాల్లో సన్నబియ్యం భోజనం, ఆర్వో తాగునీరు, దోమతెరలు, పారిశుధ్య సిబ్బంది, నిష్ణాతులైన ఉపాధ్యాయులతో విద్యా ప్రమాణాలు మెరుగుపరుస్తున్నామని పేర్కొన్నారు. ప్రతి బీసీ విద్యార్థి చదువులో ముందుకు రావాలని, తల్లిదండ్రులు తమ పిల్లలను హాస్టళ్లలో చేర్పించాలని ఆమె కోరారు.