తుంగతుర్తి నియోజకవర్గ కేంద్రంలో రూ.29 కోట్ల వ్యయంతో మంజూరైన సివిల్ కోర్టు నిర్మాణానికి స్థల పరిశీలన చేపట్టారు. బుధవారం తుంగతుర్తి మండల కేంద్రంలోని జాతీయ రహదారి 365 పక్కన కోర్టు భవన నిర్మాణానికి అనువైన స్థలాన్ని తుంగతుర్తి శాసనసభ్యులు మందుల సామేలు పరిశీలించారు.ఈ సందర్భంగా ఎమ్మెల్యే మందుల సామేలు మాట్లాడుతూ తుంగతుర్తి నియోజకవర్గ ప్రజలకు న్యాయ సేవలు మరింత అందుబాటులోకి తీసుకురావాలనే ఉద్దేశంతో సివిల్ కోర్టు మంజూరు చేయించుకున్నామని తెలిపారు. రూ.29 కోట్లతో నిర్మించనున్న కోర్టు భవనానికి స్థల పరిశీలన పూర్తయిందని, అవసరమైన ప్రక్రియను త్వరితగతిన పూర్తి చేసి అతి త్వరలో శంకుస్థాపన కార్యక్రమాన్ని నిర్వహిస్తామని వెల్లడించారు.తుంగతుర్తి కేంద్రంలో సివిల్ కోర్టు ఏర్పాటుతో నియోజకవర్గ ప్రజలకు న్యాయపరమైన సేవలు సులభంగా అందుబాటులోకి వస్తాయని, న్యాయం కోసం దూర ప్రాంతాలకు వెళ్లాల్సిన ఇబ్బందులు తగ్గుతాయని పేర్కొన్నారు. కోర్టు భవన నిర్మాణం పూర్తయితే తుంగతుర్తి అభివృద్ధిలో మరో కీలక ముందడుగు పడుతుందని ఎమ్మెల్యే తెలిపారు.