నారాయణఖేడ్ నియోజకవర్గంలోని మానూర్ మండల పరిధిలోని తోర్నల్ గ్రామంలో శుక్రవారం గ్రామ సర్పంచ్ సంగమేశ్వర్ పాటిల్, గ్రామ పంచాయతీ కార్యదర్శి, గ్రామ పెద్దలు, గ్రామస్తులు, యువత ఆధ్వర్యంలో మొక్కల పంపిణీ కార్యక్రమాన్ని నిర్వహించారు. ఈ సందర్భంగా గ్రామంలోని ప్రజలకు వివిధ రకాల మొక్కలను పంపిణీ చేసి, ప్రతి ఒక్కరూ మొక్కలను నాటడంతో పాటు వాటిని సంరక్షించాలని సూచించారు. పర్యావరణ పరిరక్షణలో భాగంగా గ్రామంలో పచ్చదనాన్ని పెంపొందించేందుకు ప్రతి కుటుంబం మొక్కలు నాటి వాటి సంరక్షణ బాధ్యత తీసుకోవాలని కోరారు. మొక్కలు నాటడం వల్ల భవిష్యత్ తరాలకు స్వచ్ఛమైన గాలి, ఆహ్లాదకరమైన వాతావరణం అందుతుందని గ్రామ పెద్దలు తెలిపారు. గ్రామ అభివృద్ధితో పాటు పర్యావరణ పరిరక్షణకు యువత, గ్రామస్తులు కలిసి ముందుకు రావాలని వారు పిలుపునిచ్చారు. ఈ కార్యక్రమంలో గ్రామ పంచాయతీ సిబ్బంది, గ్రామ పెద్దలు, యువత, మహిళలు, గ్రామస్తులు పాల్గొన్నారు.