తెలంగాణ ప్రాథమిక ఉపాధ్యాయ సంఘం (టీపీటీఎఫ్) జిల్లా నూతన అధ్యక్షుడిగా ఏకగ్రీవంగా ఎన్నికైన బండారు శ్రీనివాస్‌ను మున్సిపల్ మాజీ ఫ్లోర్ లీడర్ కక్కిరేణి శ్రీనివాస్ ఘనంగా సన్మానించారు. ప్రముఖ విద్యావేత్త కాసర్ల వీరారెడ్డి ఆధ్వర్యంలో నిర్వహించిన కార్యక్రమంలో ఆయనకు శాలువా కప్పి అభినందనలు తెలిపారు.

ఈ సందర్భంగా కక్కిరేణి శ్రీనివాస్ మాట్లాడుతూ, బండారు శ్రీనివాస్ నాయకత్వంలో టీపీటీఎఫ్ సంఘం మరింత బలోపేతం అవుతుందనే నమ్మకం వ్యక్తం చేశారు. ఉపాధ్యాయుల సమస్యల పరిష్కారంతో పాటు, దీర్ఘకాలంగా పెండింగ్‌లో ఉన్న సంఘ భవన నిర్మాణం పూర్తి చేసేందుకు ఆయన కృషి చేస్తారని ఆశాభావం వ్యక్తం చేశారు.

నూతన అధ్యక్షుడు బండారు శ్రీనివాస్ మాట్లాడుతూ, సంఘం తనపై ఉంచిన నమ్మకాన్ని నిలబెట్టుకునేందుకు పూర్తి నిబద్ధతతో పనిచేస్తానని తెలిపారు. టీపీటీఎఫ్ సంఘ భవన నిర్మాణానికి తన వంతు సహకారం అందించడంతో పాటు, సభ్యులందరి సహకారంతో త్వరితగతిన పూర్తి చేసేందుకు కృషి చేస్తానన్నారు. ఉపాధ్యాయుల సమస్యల పరిష్కారంతో పాటు సామాజిక సమస్యల పరిష్కారానికి కూడా సంఘం తరఫున నిరంతరం పనిచేస్తామని పేర్కొన్నారు.

జిల్లా వ్యాప్తంగా ఉన్న సంఘ నాయకులు, కార్యకర్తలు పెద్ద సంఖ్యలో హాజరై బండారు శ్రీనివాస్‌కు శుభాకాంక్షలు తెలిపారు. ఉపాధ్యాయుల హక్కుల సాధనకు సమిష్టిగా పోరాడి సమస్యలను పరిష్కరిస్తామని ప్రతిజ్ఞ చేశారు.

ఈ కార్యక్రమంలో వార్డు సభ్యులు రమేష్ రెడ్డి, శ్రీనివాస్ గౌడ్, రమణ, వీరయ్య, కృష్ణంరాజు, పిన్నెల్లి వెంకటేష్, ప్రభాకర్, రమేష్, అశోక్, రేవన్ తదితరులు పాల్గొన్నారు.