ఖైదీల సంక్షేమం, భద్రతపై ప్రత్యేక దృష్టి

తెలంగాణ రాష్ట్ర కరాగార శాఖ డైరెక్టర్ జనరల్ శుక్రవారం సూర్యాపేట సబ్ జైలును సందర్శించి సమగ్రంగా తనిఖీ నిర్వహించారు. జైలు పరిసరాల పరిశుభ్రత నుంచి ఖైదీలకు అందుతున్న ఆహారం, వైద్య సేవలు, భద్రతా ఏర్పాట్లు వరకు ప్రతి అంశాన్ని సవివరంగా పరిశీలించారు.

తనిఖీ సందర్భంగా ఖైదీలతో ప్రత్యక్షంగా మాట్లాడిన డీజీ, వారి సమస్యలు, అవసరాలు తెలుసుకుని అధికారులకు తగిన సూచనలు చేశారు. ఖైదీల ఆరోగ్య పరిస్థితులపై ప్రత్యేక దృష్టి సారించిన ఆమె, జైలులో వైద్య సిబ్బంది ఎప్పటికప్పుడు అందుబాటులో ఉండాలని, అవసరమైన మందులను సరిపడా నిల్వ ఉంచాలని ఆదేశించారు.

జైలులో భద్రతా వ్యవస్థలపై కూడా సమీక్ష నిర్వహించిన డాక్టర్ సౌమ్య మిశ్రా, ఎక్కడైనా లోపాలు ఉన్నాయా అనే అంశాన్ని పరిశీలించారు. సీసీటీవీ కెమెరాలు సక్రమంగా పనిచేస్తున్నాయో లేదో నిర్ధారించుకోవాలని, భద్రత విషయంలో ఎలాంటి నిర్లక్ష్యం ఉండకూడదని అధికారులను హెచ్చరించారు.

అలాగే జైలు పరిపాలనలో పారదర్శకతకు ప్రాధాన్యత ఇవ్వాలని, ఖైదీలతో మానవీయ దృక్పథంతో వ్యవహరించాలని స్పష్టం చేశారు. ఖైదీల పునరావాసానికి సంబంధించిన కార్యక్రమాలను మరింత విస్తృతంగా అమలు చేసి, వారికి సమాజంలో తిరిగి స్థానం కల్పించే దిశగా చర్యలు చేపట్టాలని సూచించారు.

జైలు వసతులు, పరిశుభ్రత, ఆహార నాణ్యతపై కూడా ఆమె సంతృప్తి వ్యక్తం చేసినప్పటికీ, ఇంకా మెరుగుదలకు అవకాశం ఉన్న అంశాలపై అధికారులకు మార్గనిర్దేశం చేశారు.

ఈ తనిఖీ కార్యక్రమంలో హైదరాబాద్ రేంజ్ డీఐజీ ప్రిజన్స్ డా. డి. శ్రీనివాస్, నల్గొండ డీఎస్పీ జైలు ఏఆర్ శోభన్ బాబు, సూర్యాపేట సబ్ జైలు సూపరింటెండెంట్ బి. సుధాకర్‌తో పాటు కారాగార శాఖ అధికారులు పాల్గొన్నారు.

ఈ తనిఖీతో జైలు పరిపాలనలో క్రమశిక్షణ, పారదర్శకత మరింత బలోపేతం అవుతుందని అధికారులు అభిప్రాయపడ్డారు.