సంగారెడ్డి జిల్లా నూతన జిల్లా విద్యాశాఖాధికారిగా (డీఈఓ) ఆర్. రోహిణి బుధవారం బాధ్యతలు స్వీకరించారు. హైదరాబాద్‌లో విధులు నిర్వహిస్తున్న ఆమె బదిలీపై సంగారెడ్డి జిల్లాకు వచ్చి అధికారికంగా పదవీ బాధ్యతలు చేపట్టారు. జిల్లా విద్యాశాఖ కార్యాలయంలో అధికారులు, సిబ్బంది ఆమెకు స్వాగతం పలికి శుభాకాంక్షలు తెలిపారు. ఇప్పటి వరకు డీఈఓగా విధులు నిర్వహించిన వెంకటేశ్వర్లు బదిలీపై రంగారెడ్డి జిల్లాకు వెళ్లగా, ఆయన స్థానంలో ఆర్. రోహిణి నియమితులయ్యారు. విద్యా రంగంలో తనకున్న అనుభవంతో జిల్లాలో ప్రభుత్వ పాఠశాలల అభివృద్ధి, విద్యా ప్రమాణాల పెంపు, విద్యార్థులకు నాణ్యమైన విద్య అందేలా ప్రత్యేక దృష్టి సారించనున్నట్లు తెలిపారు. అలాగే ప్రభుత్వం అమలు చేస్తున్న విద్యా సంక్షేమ కార్యక్రమాలను సమర్థవంతంగా విద్యార్థులకు చేరవేసేందుకు కృషి చేస్తామని పేర్కొన్నారు. ఆమె రాకతో జిల్లాలో విద్యా రంగం మరింత అభివృద్ధి చెందుతుందని అధికారులు, ఉపాధ్యాయ వర్గాలు ఆశాభావం వ్యక్తం చేశాయి.