కాంట్రాక్టర్‌కు బ్లాక్‌లిస్ట్ హెచ్చరిక

పద్ధతి మార్చుకుని పనులు నిర్వహించకపోతే కాంట్రాక్ట్ లైసెన్సును బ్లాక్‌లిస్ట్‌లో పెడతామని స్థానిక సంస్థల అదనపు కలెక్టర్ భాస్కర్ రావు దవాఖాన శానిటేషన్ కాంట్రాక్టర్‌ను తీవ్రంగా హెచ్చరించారు.

బుధవారం రామన్నపేట ప్రభుత్వ దవాఖానను ఆయన ఆకస్మికంగా తనిఖీ చేశారు. రికార్డులను పరిశీలించి, రోగులతో మాట్లాడి అందుతున్న వైద్య సేవలపై ఆరా తీశారు. ఆసుపత్రి పరిసరాలను పరిశీలించిన ఆయన, శానిటేషన్ లోపాలపై ఆగ్రహం వ్యక్తం చేస్తూ కాంట్రాక్టర్‌కు ఫోన్‌లోనే తీవ్రంగా హెచ్చరించారు. రెండు రోజుల్లో దవాఖాన సూపరింటెండెంట్ సూచనల మేరకు పనులను సక్రమంగా నిర్వహించాలని ఆదేశించారు. లేని పక్షంలో షోకాజ్ నోటీసులు జారీ చేసి కాంట్రాక్ట్‌ను బ్లాక్‌లిస్ట్‌లో పెడతామని స్పష్టం చేశారు.

వైద్యులు, సిబ్బంది డిప్యూటేషన్లను వెంటనే రద్దు చేయాలని డీసీహెచ్‌ఎస్‌ను ఫోన్‌లో ఆదేశించారు. ఆసుపత్రి ఆవరణలో పిచ్చి మొక్కలు తొలగించడం, డ్రైనేజీ పనులు చేపట్టాలని ఎంపీడీఓ ఆవుల రాములును ఆదేశించారు.ఈ కార్యక్రమంలో దవాఖాన సూపరింటెండెంట్ శ్వేత ప్రియాంక, ఏపీఓ వెంకన్న తదితరులు పాల్గొన్నారు