టీయూడబ్ల్యూజే (ఐజేయు) సంగారెడ్డి జిల్లా యూనియన్ జనరల్ సెక్రటరీగా ఉల్లిగడ్డల శివకుమార్ ఏకగ్రీవంగా ఎన్నికయ్యారు. ఈ సందర్భంగా తన ఎన్నికకు సహకరించిన రాష్ట్ర అధ్యక్షుడు విరాహత్ అలీ, రాష్ట్ర ఉపాధ్యక్షుడు ఎంఎంకే ఫైసల్, జిల్లా అధ్యక్షుడు బండారు యాదగిరి, జిల్లా జర్నలిస్టులు, సంఘ సభ్యులందరికీ ఆయన హృదయపూర్వక కృతజ్ఞతలు తెలిపారు. తనపై ఉంచిన నమ్మకాన్ని నిలబెట్టుకుంటూ జర్నలిస్టుల హక్కుల పరిరక్షణ, సంక్షేమం, వృత్తిపరమైన సమస్యల పరిష్కారానికి అంకితభావంతో పనిచేస్తానని హామీ ఇచ్చారు. ముఖ్యంగా చిన్న, మధ్యతరహా వార్తాపత్రికల జర్నలిస్టులు ఎదుర్కొంటున్న సమస్యలను సంఘం దృష్టికి తీసుకెళ్లి వాటి పరిష్కారానికి సమిష్టిగా కృషి చేస్తానన్నారు. జిల్లాలోని ప్రతి జర్నలిస్టుకు సంఘం అండగా నిలిచేలా కార్యాచరణ రూపొందించి, సభ్యుల సంక్షేమం, వృత్తి గౌరవం, హక్కుల సాధనతో పాటు జర్నలిస్టుల ఐక్యతను మరింత బలోపేతం చేయడమే తన ప్రధాన లక్ష్యమని తెలిపారు. శివకుమార్ ఏకగ్రీవ ఎన్నిక పట్ల జిల్లా వ్యాప్తంగా జర్నలిస్టులు హర్షం వ్యక్తం చేస్తూ, ఆయన నాయకత్వంలో సంఘం మరింత బలోపేతమై జర్నలిస్టుల సమస్యల పరిష్కారంలో కీలక పాత్ర పోషిస్తుందనే ఆశాభావం వ్యక్తం చేశారు.