స్నేహితుల దినోత్సవం సందర్భంగా హైదరాబాద్‌లో ఆత్మీయ సమ్మేళనం.

హైదరాబాద్, ఆగస్టు 2 (స్థానికం ప్రతినిధి):

కాలం మారినా, సాంకేతికత పెరిగినా నిజమైన స్నేహానికి కాలపరిమితి ఉండదని ‘కలం స్నేహితులు’ మరోసారి నిరూపించారు. దాదాపు 25 ఏళ్ల క్రితం వండర్ వరల్డ్ మాసపత్రికలో నిర్వహించిన ‘కలం స్నేహం’ శీర్షిక ద్వారా ఉత్తరాల ద్వారా పరిచయమైన సుమారు 35 మంది నేటికీ తమ అనుబంధాన్ని కొనసాగిస్తూ ఆదర్శంగా నిలుస్తున్నారు.

సోషల్ మీడియా లేని రోజుల్లో దినపత్రికలు, మాసపత్రికలు, సాహిత్య వేదికలే పరిచయాలకు వారధిగా నిలిచేవి. ఆ సమయంలో వండర్ వరల్డ్ మాసపత్రికలోని ‘కలం స్నేహం’ విభాగం ద్వారా ఏర్పడిన పరిచయాలు క్రమంగా స్నేహంగా మారాయి. అనంతరం శరత్ ఆధ్వర్యంలో ‘కలం స్నేహం అసోసియేషన్’ ఏర్పాటు చేసి ప్రతి సంవత్సరం ఒక ప్రాంతంలో సమావేశమవుతూ పరస్పర యోగక్షేమాలు తెలుసుకుంటూ వస్తున్నారు.

ఈ అసోసియేషన్‌లో తెలంగాణ, ఆంధ్రప్రదేశ్ రాష్ట్రాలకు చెందిన సభ్యులు ఉన్నారు. స్నేహితుల దినోత్సవాన్ని పురస్కరించుకుని ఈ ఏడాది ఆగస్టు మొదటి ఆదివారం హైదరాబాద్‌లోని నాగోల్‌లో సుమారు 22 మంది స్నేహితులు ఆత్మీయంగా కలుసుకున్నారు.

తిరుపతి, కడప, కర్నూలు, నిజామాబాద్, నల్గొండ తదితర ప్రాంతాల నుంచి వచ్చిన సభ్యులు పాత జ్ఞాపకాలను నెమరువేసుకుంటూ సంతోషంగా గడిపారు. ఉత్తరాలతో ప్రారంభమైన ఈ స్నేహబంధం పాతికేళ్లుగా కొనసాగుతుండడం విశేషమని సభ్యులు పేర్కొన్నారు. ఈ సందర్భంగా ఒకరినొకరు సన్మానించుకుని భవిష్యత్తులోనూ ఇదే అనుబంధాన్ని కొనసాగించాలని సంకల్పించారు.