రామన్నపేట: స్థానిక ప్రభుత్వ డిగ్రీ కళాశాలలో బీఏ ద్వితీయ సంవత్సరం చదువుతున్న రావిరాల సంతోష ప్రతిష్ఠాత్మక అజీమ్ ప్రేమ్‌జీ ఫౌండేషన్ జాతీయ ఉపకార వేతనానికి ఎంపికైనట్లు కళాశాల ప్రధానాచార్యులు ఆచార్య రాహత్ ఖానం తెలిపారు.

పదో తరగతి, ఇంటర్మీడియట్ పరీక్షల్లో అత్యుత్తమ ప్రతిభ కనబరిచి ప్రథమ శ్రేణిలో ఉత్తీర్ణత సాధించినందుకు సంతోష ఈ జాతీయ ఉపకార వేతనానికి ఎంపికైనట్లు ఆయన పేర్కొన్నారు. కష్టపడి చదివే విద్యార్థులకు ప్రతిభకు తగిన గుర్తింపు తప్పకుండా లభిస్తుందని, సంతోషను ఆదర్శంగా తీసుకొని ఇతర విద్యార్థులు కూడా ఉన్నత లక్ష్యాలతో ముందుకు సాగాలని సూచించారు.

ఈ సందర్భంగా కళాశాల ప్రధానాచార్యులు, అధ్యాపకులు విద్యార్థిని రావిరాల సంతోషను అభినందించి, భవిష్యత్తులో మరిన్ని విజయాలు సాధించాలని ఆకాంక్షించారు.