చౌటుప్పల్ మున్సిపాలిటీ పరిధిలోని అత్యంత రద్దీగా ఉండే వలిగొండ రోడ్డు జంక్షన్‌ను ముందస్తు సమాచారం లేకుండా, ప్రత్యామ్నాయ ఏర్పాట్లు చేయకుండా రాత్రికి రాత్రే మూసివేయడంపై స్థానికులు భగ్గుమన్నారు. భారీ క్రేన్ల సహాయంతో సిమెంట్ దిమ్మెలు ఏర్పాటు చేసి రహదారిని మూసివేయడాన్ని నిరసిస్తూ నాయకుడు చెరుకు శివకుమార్ గౌడ్ ఆధ్వర్యంలో స్థానికులు మెరుపు ధర్నాకు దిగారు. రహదారిపై బైఠాయించి అధికారుల చర్యలను అడ్డుకోవడంతో చౌటుప్పల్‌లో ఉద్రిక్త వాతావరణం నెలకొంది.ఈ సందర్భంగా చెరుకు శివకుమార్ గౌడ్ మాట్లాడుతూ... జాతీయ రహదారుల అధికారుల ఏకపక్ష వైఖరిపై తీవ్రస్థాయిలో ధ్వజమెత్తారు. "నిత్యం వేలాది మంది వాహనదారులు, పాదచారులు, పాఠశాల విద్యార్థులు రాకపోకలు సాగించే కీలకమైన జంక్షన్‌ను రాత్రికి రాత్రే మూసివేయడం దారుణం. ప్రజలకు ఎలాంటి ఇబ్బంది కలగకుండా అండర్‌పాస్, ఫ్లైఓవర్ లేదా ప్రత్యామ్నాయ మార్గాలు ఏర్పాటు చేయకుండా ఈ నిర్ణయం తీసుకోవడం స్థానికుల భద్రతను పూర్తిగా గాలికొదిలేయడమే" అని విమర్శించారు.​తక్షణమే మూసివేత పనులను నిలిపివేయాలని, ప్రజల రాకపోకలకు శాశ్వత పరిష్కారం చూపే వరకు ఈ చర్యలను ఎంతమాత్రం సహించేది లేదని ఆయన స్పష్టం చేశారు. అధికారులు ప్రజా సమస్యలను గుర్తించి తమ నిర్ణయాన్ని పునరాలోచించుకోకపోతే, రాబోయే రోజుల్లో పెద్ద ఎత్తున ప్రజా పోరాటం చేపడతామని హెచ్చరించారు.​ఈ నిరసన కార్యక్రమంలో స్థానిక నాయకులు, ప్రజలు, వ్యాపారులు, భారీ సంఖ్యలో వాహనదారులు పాల్గొని తమ మద్దతు తెలిపారు.