65 మంది మహిళలతో ఆటపాటలు.. విజేతలకు బహుమతులు

శోభనాద్రిపురం: గ్రామంలోని ఎంపీయూపీఎస్‌ ప్రాథమికోన్నత పాఠశాలలో బతుకమ్మ సంబరాలను ఘనంగా నిర్వహించారు. గ్రామానికి చెందిన 65 మంది మహిళలు పాల్గొని ఆటపాటలతో సందడి చేశారు. రోజువారీ పనుల ఒత్తిడిని మరిచి మూడు గంటలపాటు ఉత్సాహంగా గడిపారు. మహిళలకు ఆటల పోటీలు నిర్వహించడంతోపాటు విద్యార్థులు సాంస్కృతిక కార్యక్రమాలతో అలరించారు. పోటీల్లో విజేతలకు గ్రామ సర్పంచ్‌ కంచి మధుసూదన్‌ ఇత్తడి పూజా దీపాలను బహుమతులుగా అందజేశారు.

ఈ సందర్భంగా సర్పంచ్‌ మాట్లాడుతూ బతుకమ్మ తెలంగాణ సంస్కృతి, సంప్రదాయాలకు ప్రతీక అని, ఈ పండుగ ప్రతి ఒక్కరి జీవితాల్లో సంతోషాన్ని నింపాలని ఆకాంక్షించారు. ప్రజలంతా సిరిసంపదలు, ఆయురారోగ్యాలతో కలిసిమెలిసి జీవించాలని కోరుకున్నారు. కార్యక్రమంలో మహిళా సంఘాల సభ్యులు, విద్యార్థుల తల్లిదండ్రులు, మహిళా ఉద్యోగులు, అంగన్‌వాడీ సిబ్బంది, ఉపాధ్యాయులు, ఆశా కార్యకర్తలు, విద్యార్థులు పాల్గొన్నారు. కార్యక్రమ విజయానికి సహకరించిన మహిళలకు పాఠశాల ప్రధానోపాధ్యాయుడు గడ్డం శ్రీనివాస్‌రెడ్డి కృతజ్ఞతలు తెలిపారు.