సంగారెడ్డి జిల్లా కలెక్టర్, జిల్లా పోలీసు శాఖ సంయుక్తంగా ఎస్ఐ, కానిస్టేబుల్ అభ్యర్థులకు అందించనున్న ఉచిత శిక్షణలో భాగంగా దరఖాస్తు చేసుకున్న అభ్యర్థులకు రేపు (అక్టోబర్ 10, శనివారం) ఉదయం 10 గంటలకు ప్రాథమిక ఎంపిక పరీక్ష నిర్వహించనున్నట్లు జిల్లా ఎస్పీ పరితోష్ పంకజ్ తెలిపారు. అభ్యర్థులు తమ పేర్లను సంబంధిత జాబితాలో సరిచూసుకుని, తమకు కేటాయించిన పరీక్షా కేంద్రాలకు సమయానికి చేరుకోవాలని సూచించారు.సంగారెడ్డి కేంద్రంగా శాంతినగర్‌లోని సెయింట్ ఆంథోనీ హైస్కూల్‌లో, అందోల్ కేంద్రంగా జోగిపేట ప్రభుత్వ డిగ్రీ కళాశాలలో, జహీరాబాద్ కేంద్రంగా ప్రభుత్వ జూనియర్ కళాశాలలో పరీక్ష నిర్వహించనున్నారు. ఆయా పోలీస్ స్టేషన్ల పరిధిలోని అభ్యర్థులు తమకు కేటాయించిన కేంద్రాల్లోనే పరీక్షకు హాజరుకావాలి.పరీక్షకు వచ్చే అభ్యర్థులు ఆధార్ కార్డుతో పాటు ఎస్ఐ లేదా కానిస్టేబుల్ ఉద్యోగానికి దరఖాస్తు చేసుకున్న ప్రాథమిక దరఖాస్తు పత్రాన్ని (TGPLRB Application Form) తప్పనిసరిగా తీసుకురావాలి. ఉదయం 10 గంటలకల్లా పరీక్షా కేంద్రానికి చేరుకునేలా ముందుగానే రావాలని ఎస్పీ సూచించారు. సంగారెడ్డి జిల్లాకు చెందిన అర్హులైన అభ్యర్థులకు మాత్రమే పరీక్షకు అనుమతి ఉంటుందని, ఇతర జిల్లాల అభ్యర్థులకు అనుమతి ఉండదని స్పష్టం చేశారు. అభ్యర్థులందరూ ఈ సూచనలు పాటించి, ఉచిత శిక్షణ అవకాశాన్ని సద్వినియోగం చేసుకోవాలని జిల్లా ఎస్పీ పరితోష్ పంకజ్ కోరారు.