పూల పరిమళాలు.. విద్యార్థినుల ఆటపాటలతో సందడిగా మారిన పాఠశాల ప్రాంగణం

​వైభవంగా సాగిన దాండియా, సాంస్కృతిక కార్యక్రమాలు

తెలంగాణ సంస్కృతీ సంప్రదాయాలకు ప్రతీకయైన బతుకమ్మ పండుగ వేడుకలు చౌటుప్పల్‌లోని ఐరా గ్లోబల్ హైస్కూల్ ప్రాంగణంలో శుక్రవారం అత్యంత వైభవంగా,కన్నులపండువగా జరిగాయి. పాఠశాల యాజమాన్యం, ఉపాధ్యాయులు, విద్యార్థినులు, తల్లిదండ్రులు సాంప్రదాయ దుస్తుల్లో ఉత్సాహంగా పాల్గొనడంతో ప్రాంగణమంతా పండగ శోభ సంతరించుకుంది.రంగురంగుల రకరకాల పూలతో అలంకరించిన బతుకమ్మల చుట్టూ విద్యార్థినులు ఆడుతూ పాడుతూ చేసిన నృత్యాలు, దాండియా ఆటలు ప్రత్యేక ఆకర్షణగా నిలిచాయి.​ఈ కార్యక్రమానికి ముఖ్య అతిథిగా హాజరైన పాఠశాల చైర్మన్, కరస్పాండంట్ అరుణ శ్రీకాంత్ మాట్లాడుతూ.. బతుకమ్మ పండుగ ప్రకృతిని, ఆడపడుచులను గౌరవించే గొప్ప పండుగని కొనియాడారు. విద్యార్థులు చదువుతో పాటు మన పూర్వీకుల సంస్కృతీ సంప్రదాయాలను కాపాడుకోవాలని, ఇలాంటి వేడుకలు వారిలో ఐక్యతను, సోదరభావాన్ని పెంచుతాయని పేర్కొన్నారు. ​పాఠశాల ప్రిన్సిపాల్ రాజశేఖర్ రెడ్డి మాట్లాడుతూ.. తెలంగాణ అస్తిత్వానికి ప్రతీకగా నిలిచే బతుకమ్మ సంబరాలను తమ పాఠశాలలో నిర్వహించడం ఎంతో ఆనందంగా ఉందన్నారు. విద్యార్థులు ఆధునిక విద్యను అభ్యసిస్తూనే, మన ప్రాచీన సంస్కృతికి రాయబారులుగా నిలవాలని పిలుపునిచ్చారు.​ఈ వేడుకల్లో పాఠశాల ఉపాధ్యాయులు, విద్యార్థినులు, వారి తల్లిదండ్రులు పెద్ద సంఖ్యలో పాల్గొన్నారు.