నారాయణఖేడ్ మున్సిపాలిటీ పరిధిలోని 9వ వార్డు సాయినగర్, వివేకానంద కాలనీ, బుడగ జంగం కాలనీలలో ప్రజల సౌకర్యార్థం నూతన హైమాస్ట్‌ లైట్లను ఏర్పాటు చేశారు. జహీరాబాద్ పార్లమెంట్ సభ్యుడు సురేష్ కుమార్ షేట్కార్, ఎమ్మెల్యే డాక్టర్ పి. సంజీవరెడ్డి, మున్సిపల్ చైర్మన్ నాగేష్ కుమార్ షేట్కార్, మున్సిపల్ వైస్ చైర్మన్‌ల ఆదేశాల మేరకు 9వ వార్డు కౌన్సిలర్ బాణపురం రాజు ముదిరాజ్ ఈ లైట్లను ఏర్పాటు చేయించారు.వీటి ఏర్పాటుతో రాత్రి వేళల్లో కాలనీల వీధుల్లో మెరుగైన వెలుతురు అందడంతో పాటు, ప్రజల రాకపోకలకు సౌకర్యంగా ఉంటుందని స్థానికులు తెలిపారు. తమ కాలనీల సమస్యలను గుర్తించి, ప్రజలకు అవసరమైన సౌకర్యాలు కల్పించేందుకు కృషి చేసిన కౌన్సిలర్ బాణపురం రాజు ముదిరాజ్‌కు కాలనీవాసులు ప్రత్యేక కృతజ్ఞతలు తెలిపారు. ఈ కార్యక్రమం పట్ల ఏసు రెడ్డి, రజినీకాంత్, లక్ష్మీనారాయణ, దుర్గయ్య, అనిల్ తదితరులు హర్షం వ్యక్తం చేశారు.