పెద్దకాపర్తిలో ఘనంగా తల్లిపాల వారోత్సవాల ప్రారంభం – తల్లిపాల ప్రాధాన్యంపై అధికారుల అవగాహన.

నల్గొండ జిల్లా చిట్యాల మండలం వెలిమినేడు సెక్టార్ పరిధిలోని పెద్దకాపర్తి గ్రామంలో తల్లిపాల వారోత్సవాలు శనివారం ఘనంగా ప్రారంభమయ్యాయి. ఈ కార్యక్రమంలో ఐసీడీఎస్ మునుగోడు ప్రాజెక్టు సీడీపీవో లావణ్య కుమారి, సెక్టార్ సూపర్‌వైజర్ నాగమణి పాల్గొని తల్లిపాల విశిష్టతను గర్భిణీలు, బాలింతలకు వివరించారు.

ఈ సందర్భంగా అధికారులు మాట్లాడుతూ, శిశువు జన్మించిన గంటలోపే తల్లిపాలు పట్టించడం అత్యంత అవసరమని సూచించారు. ముర్రుపాలు (కొలస్ట్రం) శిశువుకు సహజ రోగనిరోధక శక్తిని అందించి వివిధ అంటువ్యాధుల నుంచి రక్షిస్తాయని తెలిపారు. జననం నుంచి తొలి ఆరు నెలల వరకు కేవలం తల్లిపాలు మాత్రమే అందించడం ద్వారా శిశువు ఆరోగ్యవంతంగా ఎదుగుతాడని వివరించారు.కార్యక్రమంలో సెక్టార్ పరిధిలోని అంగన్‌వాడీ టీచర్లు, గర్భిణీలు, బాలింతలు, ఆయాలు, గ్రామస్థులు పెద్ద సంఖ్యలో పాల్గొని తల్లిపాల ప్రాముఖ్యతపై అవగాహన పొందారు. అధికారులు తల్లిపాలే బిడ్డకు సంపూర్ణ ఆహారమని, ప్రతి తల్లి ఈ విషయాన్ని బాధ్యతగా పాటించాలని పిలుపునిచ్చారు.