తుంగతుర్తి మండల కేంద్రంతో పాటు పరిసర గ్రామాల్లో కోతుల బెడద రోజురోజుకూ పెరుగుతూ ప్రజలకు తీవ్ర ఇబ్బందులు కలిగిస్తోంది. ఒకప్పుడు అడవులు, కొండ ప్రాంతాలకే పరిమితమైన కోతులు ఇప్పుడు గుంపులు గుంపులుగా గ్రామాల్లో సంచరిస్తూ ప్రజలను భయభ్రాంతులకు గురిచేస్తున్నాయి. ఇళ్ల పైకప్పులపై, చెట్లపై, విద్యుత్ స్తంభాలపై తిరుగుతూ ఎప్పుడైనా ఇళ్లలోకి చొరబడతాయేమోనని ప్రజలు ఆందోళన చెందుతున్నారు.ఇంటి తలుపులు లేదా కిటికీలు కాస్త తెరిచి ఉంచినా చాలు కోతులు లోనికి ప్రవేశించి నిత్యావసర సరుకులు, పప్పులు, పండ్లు, కూరగాయలు, వండిన ఆహారాన్ని ఎత్తుకెళ్తున్నాయి.దీంతో మహిళలు ఇంటి పనులు చేయడానికే భయపడాల్సిన పరిస్థితి ఏర్పడింది. చిన్నపిల్లలు ఒంటరిగా బయటకు వెళ్లేందుకు తల్లిదండ్రులు వెనుకాడుతున్నారు. వృద్ధులు, మహిళలపై కోతులు దాడి చేసిన ఘటనలు కూడా చోటుచేసుకోవడంతో ప్రజలు తీవ్ర ఆందోళన వ్యక్తం చేస్తున్నారు.ఉదయం నుంచి సాయంత్రం వరకు కోతులు వీధుల్లో స్వేచ్ఛగా సంచరిస్తుండటంతో ప్రజలు ఇంటి బయటకు రావడానికి కూడా భయపడుతున్నారు. కొన్నిచోట్ల ఆరబెట్టిన బట్టలు, ఇంటి సామగ్రిని కూడా కోతులు ధ్వంసం చేస్తున్నాయని స్థానికులు చెబుతున్నారు.ఇంటి పైకప్పులపై పరుగులు తీయడం వల్ల పెంకులు, రేకులు దెబ్బతింటున్నాయని, పండ్ల చెట్లను కూడా నాశనం చేస్తున్నాయని ఆవేదన వ్యక్తం చేస్తున్నారు.ఈ కోతులను సురక్షితంగా పట్టుకుని అటవీ ప్రాంతాలకు తరలించేలా అటవీ శాఖ, స్థానిక పరిపాలన అధికారులు సమన్వయంతో చర్యలు చేపట్టాలని ప్రజలు కోరుతున్నారు.రోజురోజుకూ కోతుల సంఖ్య పెరుగుతుండటంతో పరిస్థితి మరింత ప్రమాదకరంగా మారే అవకాశం ఉందని స్థానికులు ఆందోళన వ్యక్తం చేస్తున్నారు.ప్రజల ప్రాణాలు, ఆస్తులకు ముప్పుగా మారిన ఈ సమస్యపై అధికారులు వెంటనే స్పందించి శాశ్వత పరిష్కారం చూపాలని తుంగతుర్తి మండల ప్రజలు విజ్ఞప్తి చేస్తున్నారు.ఇటీవల ఎన్నికైన సర్పంచులు గ్రామాల అభివృద్ధితో పాటు ప్రజల భద్రతకు కూడా ప్రాధాన్యత ఇవ్వాలని స్థానికులు కోరుతున్నారు. ముఖ్యంగా కోతుల బెడద రోజురోజుకూ పెరుగుతున్న నేపథ్యంలో కొత్తగా ఎన్నికైన సర్పంచులు ప్రత్యేక చొరవ తీసుకుని అటవీ శాఖ అధికారులతో సమన్వయం చేసి కోతులను పట్టించి అటవీ ప్రాంతాలకు తరలించే చర్యలు చేపట్టాలని విజ్ఞప్తి చేస్తున్నారు. ఈ సమస్యకు తాత్కాలిక చర్యలు కాకుండా శాశ్వత పరిష్కారం చూపించి ప్రజలను కోతుల బెడద నుంచి విముక్తి కల్పించాలని గ్రామస్థులు కోరుతున్నారు.