205 కేసులు నమోదు.. 205 మంది యజమానుల అరెస్ట్

మల్కాజిగిరి, ఆగస్టు 2: బాల కార్మిక వ్యవస్థ నిర్మూలన, చిన్నారుల రక్షణే లక్ష్యంగా మల్కాజిగిరి పోలీస్ కమిషనర్ బడుగుల సుమతి, ఐపీఎస్ పర్యవేక్షణలో చేపట్టిన 'ఆపరేషన్ ముస్కాన్–XII' విజయవంతమైంది. జూలై 1 నుంచి 31 వరకు నిర్వహించిన ప్రత్యేక డ్రైవ్‌లో 648 మంది చిన్నారులను బాల కార్మిక వ్యవస్థ, భిక్షాటన, ఇతర అసురక్షిత పరిస్థితుల నుంచి రక్షించినట్లు కమిషనర్ వెల్లడించారు.

కమిషనరేట్ పరిధిలో ఏర్పాటు చేసిన 8 ప్రత్యేక ముస్కాన్ బృందాలు, యాంటీ హ్యూమన్ ట్రాఫికింగ్ యూనిట్ (AHTU)తో కలిసి పరిశ్రమలు, ఫ్యాక్టరీలు, హోటళ్లు, వర్క్‌షాపులు, నిర్మాణ ప్రదేశాలు, వాణిజ్య సంస్థల్లో విస్తృతంగా తనిఖీలు నిర్వహించి చిన్నారులను గుర్తించి రక్షించాయి. రక్షించిన వారిలో తెలంగాణకు చెందిన 262 మంది, ఇతర రాష్ట్రాలకు చెందిన 386 మంది ఉన్నారు.

ప్రత్యేక ఆపరేషన్‌లో 36 హాట్‌స్పాట్లలో తనిఖీలు నిర్వహించగా, 54 చైల్డ్ కేర్ ఇన్‌స్టిట్యూషన్స్లో 5,828 DARPAN సెర్చ్‌లు చేపట్టారు. బాల కార్మిక వ్యవస్థ నిర్మూలనపై 97 అవగాహన కార్యక్రమాలు నిర్వహించి 2,210 మందికి అవగాహన కల్పించారు. బాల కార్మికులను పనిలో పెట్టుకున్న వారిపై 205 ఎఫ్‌ఐఆర్‌లు నమోదు చేసి, 205 మంది యజమానులు, ప్రతినిధులను అరెస్టు చేసినట్లు తెలిపారు.

"పిల్లల చేతుల్లో పనిముట్లు కాదు.. పుస్తకాలే ఉండాలి"

ఈ సందర్భంగా పోలీస్ కమిషనర్ బడుగుల సుమతి, ఐపీఎస్ మాట్లాడుతూ, "ప్రతి చిన్నారికి సురక్షితమైన, గౌరవప్రదమైన బాల్యం అందించడం సమాజం మొత్తం బాధ్యత. బాల కార్మిక వ్యవస్థ నిర్మూలనలో ప్రతి ఒక్కరూ భాగస్వాములు కావాలి" అని పిలుపునిచ్చారు.

బాల కార్మికులు లేదా ఆపదలో ఉన్న చిన్నారులు కనిపిస్తే వెంటనే **100, 112 లేదా 1098 (చైల్డ్ హెల్ప్‌లైన్)**కు సమాచారం అందించాలని కమిషనర్ విజ్ఞప్తి చేశారు.