నల్లగొండ జిల్లా నకిరేకల్ నియోజకవర్గంలో రంజాన్ పర్వదినాన్ని పురస్కరించుకుని మాజీ ఎమ్మెల్యే చిరుమర్తి లింగయ్య పలు మసీదులను సందర్శించి ముస్లిం సోదరులకు శుభాకాంక్షలు తెలిపారు.

ఈ సందర్భంగా ఆయన మాట్లాడుతూ, రంజాన్ నెలలో భక్తి శ్రద్ధలతో ఉపవాసాలు ఉండి పండుగ జరుపుకుంటున్న ప్రతి ఒక్కరికి శుభాకాంక్షలు తెలిపారు. ఈ పర్వదినం ప్రతి ఇంట్లో ఆనందం, ఆరోగ్యం, ఐశ్వర్యం నింపాలని ఆకాంక్షించారు.

అలాగే గతంలో రంజాన్‌తో పాటు ఇతర పండుగలు అంగరంగ వైభవంగా నిర్వహించబడేవని, ప్రస్తుతం అలాంటి పరిస్థితి కనిపించడం లేదని అన్నారు. మైనారిటీలకు ఇచ్చిన హామీలను నెరవేర్చడంలో రాష్ట్ర ప్రభుత్వం విఫలమైందని విమర్శించారు.

బీఆర్ఎస్ ప్రభుత్వ హయాంలో కేసీఆర్ నాయకత్వంలో రాష్ట్రం కుల, మతాలకు అతీతంగా అభివృద్ధి సాధించిందని పేర్కొన్నారు. ముస్లింల సంక్షేమానికి రెసిడెన్షియల్ పాఠశాలలు, షాదీ ముబారక్, మసీదుల అభివృద్ధి, రంజాన్ గిఫ్ట్ ప్యాక్‌లు, మైనార్టీ కార్పొరేషన్లు, స్కాలర్‌షిప్‌లు వంటి పథకాలు అమలు చేసినట్లు గుర్తుచేశారు.

తాను ఎమ్మెల్యేగా ఉన్న సమయంలో నియోజకవర్గంలో ముస్లింల సంక్షేమానికి ప్రాధాన్యత ఇచ్చినట్లు తెలిపారు. నకిరేకల్ మండల కేంద్రంలో షాదిఖానా నిర్మాణానికి రూ.1 కోటి నిధులు మంజూరు చేసి, స్థలం కేటాయించి టెండర్ ప్రక్రియ పూర్తి చేసినప్పటికీ ఇప్పటికీ పనులు ప్రారంభం కాలేదని అన్నారు.

నార్కట్‌పల్లి, చిట్యాల మండల కేంద్రాల్లో షాదిఖానాలను అభివృద్ధి చేసినట్లు తెలిపారు. అలాగే రామన్నపేటలో అలీ సాహెబ్ గుట్టను పర్యాటక కేంద్రంగా అభివృద్ధి చేయాలనే ఉద్దేశంతో సీసీ రోడ్డు నిర్మాణం చేపట్టినట్లు పేర్కొన్నారు