రామన్నపేట ప్రభుత్వాసుపత్రిని 100 పడకల ఆసుపత్రిగా మార్చాలని డిమాండ్

రామన్నపేట ప్రభుత్వ ఆసుపత్రిని 100 పడకల ఆసుపత్రిగా అభివృద్ధి చేసి, అసెంబ్లీ బడ్జెట్ సమావేశాల్లో రూ.40 కోట్లు కేటాయించాలని సీపీఎం మండల కమిటీ డిమాండ్ చేసింది. ఈ మేరకు సీపీఎం ఆధ్వర్యంలో నిర్వహిస్తున్న నిరవధిక నిరాహార దీక్షలు మంగళవారం రెండో రోజుకు చేరుకున్నాయి.

ఈ సందర్భంగా నాయకులు మాట్లాడుతూ దశాబ్దాలుగా రామన్నపేట ప్రభుత్వాసుపత్రిలో కనీస మౌలిక సదుపాయాలు లేకపోవడంతో ఈ ప్రాంత ప్రజలకు సరైన వైద్యం అందడం లేదన్నారు. అత్యవసర పరిస్థితుల్లో రోగులు దూర ప్రాంతాలకు వెళ్లాల్సిన దుస్థితి నెలకొన్నదని తెలిపారు. నియోజకవర్గ కేంద్రంగా ఎనిమిది మండలాల ప్రజలకు గత 56 సంవత్సరాలుగా సేవలందిస్తున్న ఈ ఆసుపత్రి ప్రస్తుతం పాత భవనంలో ప్రమాదకర పరిస్థితుల్లో కొనసాగుతుందని ఆందోళన వ్యక్తం చేశారు.

ఏరియా ఆసుపత్రిగా బోర్డు ఏర్పాటు చేసి పది సంవత్సరాలు గడిచినా అమలు జరగలేదని, 50 పడకల ఆసుపత్రి కోసం అప్పటి వైద్య ఆరోగ్యశాఖ మంత్రి శిలాఫలకం వేసి మూడు సంవత్సరాలు గడిచినా నిధులు విడుదల కాలేదని విమర్శించారు. ప్రస్తుతం ఈ ఆసుపత్రి ప్రధమ చికిత్స, పోస్టుమార్టంలకే పరిమితమైందని, పేదలకు సరైన వైద్యం అందడం లేదన్నారు.

ప్రతిరోజూ సుమారు 400 మంది అవుట్ పేషెంట్లు ఆసుపత్రికి వస్తున్నప్పటికీ, రోగుల సంఖ్యకు అనుగుణంగా వైద్యులు లేకపోవడంతో ప్రైవేటు ఆసుపత్రులను ఆశ్రయించాల్సిన పరిస్థితి ఏర్పడిందన్నారు. గర్భిణీ స్త్రీలకు స్కానింగ్ సదుపాయం లేకపోవడంతో ప్రతిసారి ప్రైవేటు ఆసుపత్రులకు వెళ్లాల్సి వస్తోందని తెలిపారు. ఫలితంగా ప్రసవాల సంఖ్య కూడా గణనీయంగా తగ్గిందని పేర్కొన్నారు.

ప్రస్తుతం జరుగుతున్న అసెంబ్లీ బడ్జెట్ సమావేశాల్లో రూ.40 కోట్లు కేటాయించి 100 పడకల నూతన భవనం నిర్మించి, అవసరమైన మౌలిక సదుపాయాలు కల్పించాలని డిమాండ్ చేశారు. ప్రభుత్వాసుపత్రిపై ప్రభుత్వం స్పష్టమైన ప్రకటన చేసే వరకు నిరవధిక నిరాహార దీక్షలను కొనసాగిస్తామని తెలిపారు.

నిరవధిక నిరాహార దీక్షలో పాల్గొన్న నాయకులు:

సీపీఎం జిల్లా కార్యదర్శివర్గ సభ్యులు జల్లల పెంటయ్య, మండల కార్యదర్శి బొడ్డుపల్లి వెంకటేశం, మండల కార్యదర్శివర్గ సభ్యులు కూర నరసింహచారి, కందుల హనుమంతు, మండల కమిటీ సభ్యులు గొరిగే సోములు, నాగటి ఉపేందర్, వేముల సైదులు, చానకొండ రాము తదితరులు దీక్షలో పాల్గొన్నారు.