నల్లగొండ, మే 18 : ప్రభుత్వ ‘ప్రజాపాలన–ప్రగతి ప్రణాళిక’లో భాగంగా నిర్వహిస్తున్న 99 రోజుల కార్యాచరణ ప్రణాళికకు సంబంధించిన పోస్టర్‌ను జిల్లా కలెక్టర్ అనురాగ్ జయంతి సోమవారం ఆవిష్కరించారు.

కలెక్టరేట్ సమావేశ మందిరంలో నిర్వహించిన కార్యక్రమంలో రెవెన్యూ అదనపు కలెక్టర్ వెంకారెడ్డి, స్థానిక సంస్థల అదనపు కలెక్టర్ భాస్కర్‌రావుతో కలిసి యువ టూరిజం క్లబ్‌ల కార్యాచరణ పోస్టర్‌ను విడుదల చేశారు.

ఈ సందర్భంగా కలెక్టర్ మాట్లాడుతూ ‘ప్రజాపాలన–ప్రగతి ప్రణాళిక’లో భాగంగా మే 18 నుంచి 23 వరకు పర్యాటక వారోత్సవాలు నిర్వహిస్తున్నట్లు తెలిపారు. పర్యాటక రంగ అభివృద్ధితో పాటు యువతలో అవగాహన పెంపొందించేందుకు ప్రత్యేక కార్యక్రమాలు చేపడుతున్నామని పేర్కొన్నారు.

కార్యక్రమంలో జడ్పీ సీఈవో శోభారాణి, డీఆర్‌డీవో నాగిరెడ్డి, జిల్లా యువజన, క్రీడల శాఖ అధికారి ధనంజనేయులు, డీపీఆర్‌వో అరుంధతి, హౌసింగ్ పీడీ అలివేలు, ఇతర అధికారులు పాల్గొన్నారు.