సంగారెడ్డి జిల్లా న్యాల్కల్ మండలంలోని ప్రాచీన శ్రీ రామలింగేశ్వర స్వామి దేవాలయం మార్చి 3వ తేదీ మంగళవారం చంద్రగ్రహణం సందర్భంగా భక్తుల దర్శనార్థం తాత్కాలికంగా మూసివేయబడనుంది. సాయంత్రం 6 గంటల నుండి 7 గంటల వరకు ప్రధాన ఆలయం తో పాటు ఉప ఆలయాల ద్వారాలు మూసివేయబడతాయని ఆలయ అధికారులు తెలిపారు.తెలంగాణ రాష్ట్రంలో మరెక్కడా కనిపించని విధంగా స్వయంభువుగా వెలిసిన లింగాకారంలో స్వామివారు దర్శనమివ్వడం ఈ ఆలయానికి విశిష్ట గుర్తింపుగా నిలిచింది. అనాదికాలం నుంచి పూజలు అందుకుంటున్న ఈ క్షేత్రం ప్రాంతీయంగా ప్రసిద్ధి చెందడంతో పాటు మహాశివరాత్రి, కార్తీకమాసం, ప్రతి సోమవారం భక్తులతో కిటకిటలాడుతుంది. స్వామివారిని దర్శించుకుంటే కోరికలు నెరవేరుతాయని భక్తుల విశ్వాసం.

గ్రహణం ముగిసిన అనంతరం రాత్రి 7:45 గంటలకు వేద మంత్రోచ్చారణల మధ్య సంప్రోక్షణ కార్యక్రమాలు నిర్వహించి స్వామివారి పునఃప్రతిష్ఠ అనంతరం మంగళహారతులు ఇచ్చి భక్తులకు దర్శనం కల్పిస్తారు. ఈ కార్యక్రమంలో ఆలయ కమిటీ సభ్యులు, గ్రామ పెద్దలు పాల్గొంటారని తెలిపారు. భక్తులు సహకరించాలని ఆలయ అధికారులు కోరారు.