న్యాల్కల్,

న్యాల్కల్ మండల కేంద్రంలోని డప్పూర్ గ్రామ శివారులో వెలసిన శ్రీ బీరప్ప స్వామి – కామరాతి దేవి కళ్యాణ మహోత్సవం భక్తిశ్రద్ధలతో ఘనంగా నిర్వహించారు. మూడు రోజుల పాటు కొనసాగనున్న ఈ మహోత్సవంలో గ్రామ ప్రజలు, కురుమ సంఘ సభ్యులు పెద్ద సంఖ్యలో పాల్గొని ప్రత్యేక పూజలు నిర్వహించారు.మహోత్సవం సందర్భంగా గ్రామంలో భారీ ఊరేగింపు నిర్వహించారు. మహిళలు బోనాలు, కలశాలతో పాల్గొనగా, డోలు చప్పుళ్లు, ఒగ్గు కళాకారుల విన్యాసాలు ప్రత్యేక ఆకర్షణగా నిలిచాయి. భక్తులు స్వామివారికి మొక్కులు చెల్లించి ఆశీస్సులు పొందారు. గ్రామమంతా ఆధ్యాత్మిక వాతావరణంతో కళకళలాడింది.ఈ వేడుక ఐదు సంవత్సరాలకు ఒకసారి నిర్వహించే ప్రత్యేక మహోత్సవంగా గ్రామంలో విశేష ప్రాధాన్యత కలిగి ఉంది. గ్రామ పెద్దలు, యువకులు, మహిళలు కలిసి సంప్రదాయ పద్ధతిలో కార్యక్రమాలు నిర్వహించారు. బీరప్ప స్వామి – కామరాతి దేవి కళ్యాణం కురుమల ఐక్యతకు ప్రతీకగా నిలుస్తూ భక్తుల్లో ఆధ్యాత్మిక చైతన్యాన్ని పెంపొందించింది.ఈ కార్యక్రమం కురుమ సంఘం అధ్యక్షులు శివరాజ్, పుండికూర రవి ఆధ్వర్యంలో నిర్వహించారు. గ్రామ పెద్దలు, యువకులు, భక్తులు పెద్ద సంఖ్యలో హాజరై కార్యక్రమాన్ని విజయవంతం చేశారు. స్థానికులు మాట్లాడుతూ, తరతరాలుగా ఈ మహోత్సవాన్ని భక్తిశ్రద్ధలతో నిర్వహిస్తూ సంప్రదాయాన్ని కొనసాగిస్తున్నామని తెలిపారు.