సంగారెడ్డి జిల్లా న్యాల్కల్ గ్రామంలో తెలంగాణ రాష్ట్ర పంచాయతీ రాజ్ మరియు గ్రామీణ అభివృద్ధి శాఖ ఆధ్వర్యంలో చేపట్టిన 99 రోజుల కార్యాచరణ ప్రణాళిక కార్యక్రమాన్ని గ్రామంలో ప్రారంభించారు. గ్రామాన్ని పరిశుభ్రంగా, అభివృద్ధి దిశగా ముందుకు తీసుకెళ్లాలనే లక్ష్యంతో ఈ కార్యక్రమాన్ని నిర్వహిస్తున్నట్లు తెలిపారు. ఈ కార్యాచరణ ప్రణాళిక మార్చి 6 నుండి జూన్ 12 వరకు కొనసాగనుంది.ఈ కార్యక్రమంలో భాగంగా గ్రామంలోని డ్రైనేజీల శుభ్రపరిచే పనులు, చెత్త తొలగింపు, రహదారుల పరిసరాల పరిశుభ్రత, ప్రజలకు అవసరమైన మౌలిక వసతుల అభివృద్ధి వంటి పలు కార్యక్రమాలు చేపట్టనున్నారు. గ్రామాన్ని స్వచ్ఛంగా ఉంచడం ప్రతి గ్రామస్థుడి బాధ్యత అని నాయకులు పేర్కొన్నారు. గ్రామాభివృద్ధి కోసం ప్రభుత్వం తీసుకొస్తున్న కార్యక్రమాలను ప్రజలు సద్వినియోగం చేసుకోవాలని కోరారు.ఈ కార్యక్రమంలో న్యాల్కల్ గ్రామ సర్పంచ్ జ్యోతిలక్ష్మి – ప్రవీణ్ కుమార్, సహకార సంఘం మాజీ చైర్మన్ సిద్ది లింగయ్య స్వామి, అంజి, పంచాయతీ కార్యదర్శి శ్రీకాంత్ రెడ్డి, అలాగే గ్రామ యువకులు, పెద్దలు పాల్గొన్నారు. గ్రామ అభివృద్ధి కార్యక్రమాల్లో ప్రజలంతా భాగస్వాములు కావాలని వారు పిలుపునిచ్చారు.