యాదాద్రి భువనగిరి జిల్లాలో వ్యవసాయ రంగంపై వచ్చిన వార్తల ప్రభావంతో రైతులకు ప్రత్యామ్నాయ పంటలపై అవగాహన పెంచేందుకు అధికారులు చర్యలు ముమ్మరం చేశారు.

జిల్లా కలెక్టర్ అనురాగ్ జయంతి తుర్కపల్లి మండలం దత్తాయిపల్లి గ్రామంలో క్షేత్రస్థాయిలో పర్యటించి క్రాప్ బుకింగ్, డిజిటల్ పంట నమోదు, రైతు రిజిస్ట్రీ ప్రక్రియలను పరిశీలించారు.

ఈ సందర్భంగా సేంద్రీయ విధానంలో సాగు చేస్తున్న మునగ పంటను పరిశీలించిన కలెక్టర్, తక్కువ పెట్టుబడితో ఎక్కువ కాలం అధిక దిగుబడి ఇచ్చే పంటగా మునగను అభివర్ణించారు. మునగ ఆకుల్లో విటమిన్లు, కాల్షియం, ఐరన్, ప్రోటీన్లు సమృద్ధిగా ఉండటంతో అంతర్జాతీయ మార్కెట్‌లో కూడా డిమాండ్ ఉందని తెలిపారు.

ఈ తరహా యూనిట్లను జిల్లాలోని అన్ని మండలాల్లో ఏర్పాటు చేయాలని సంబంధిత అధికారులను ఆదేశించారు. రైతులు వరి పంటకు బదులుగా వాణిజ్యపరమైన లాభాలు ఇచ్చే మునగ పంటను సేంద్రీయ పద్ధతిలో సాగు చేయాలని సూచించారు.

తదుపరి ఆయిల్ పామ్ నర్సరీలు, క్షేత్రాలను పరిశీలించి, నేషనల్ మిషన్ ఆన్ ఆయిల్ పామ్ పథకాన్ని వినియోగించుకోవాలని రైతులకు సూచించారు. అలాగే భువనగిరిలో డ్రిప్ ఇరిగేషన్ ద్వారా సాగు చేస్తున్న మామిడి తోటను పరిశీలించి ఆధునిక పద్ధతులు అవలంబించాలని అన్నారు.

ఈ పర్యటనలో జిల్లా వ్యవసాయ అధికారి పీ.వీ. రమణ రెడ్డి, ఉద్యాన అధికారి మాధవి, ఇతర అధికారులు, రైతులు పాల్గొన్నారు.