రైతులకు పూర్తి మద్దతు – సన్నరకం ధాన్యానికి అదనపు బోనస్

చివ్వెంల మండలంలోని మోదిన్‌పురం గ్రామంలో ఇందిరా క్రాంతి పథకం ఆధ్వర్యంలో ఏర్పాటు చేసిన ధాన్యం కొనుగోలు కేంద్రాన్ని వ్యవసాయ మార్కెట్ కమిటీ అధ్యక్షుడు కొప్పుల వేణారెడ్డి ప్రారంభించారు.ఈ సందర్భంగా ఆయన మాట్లాడుతూ రైతులకు మేలు చేయాలనే ఉద్దేశంతో అప్పటి కాంగ్రెస్ ప్రభుత్వం ధాన్యం కొనుగోలు కేంద్రాలను ఏర్పాటు చేసినట్లు తెలిపారు. కేంద్రాలలో తేమ కొలిచే యంత్రాలు, శుభ్రపరిచే యంత్రాలు, తూకం పరికరాలు, కవర్లు, గన్నె సంచులు కొరత లేకుండా చూసుకోవాలని నిర్వాహకులకు సూచించారు.

సన్నరకం ధాన్యానికి అదనంగా ప్రతి క్వింటాలుకు ఐదు వందల రూపాయల ప్రోత్సాహకాన్ని అందిస్తున్నట్లు తెలిపారు. గ్రేడ్ ఏ ధాన్యానికి రెండు వేల మూడు వందల ఎనభై తొమ్మిది రూపాయలు, సాధారణ రకం ధాన్యానికి రెండు వేల మూడు వందల అరవై తొమ్మిది రూపాయల మద్దతు ధర లభిస్తుందని చెప్పారు.రైతులు ధాన్యాన్ని బాగా ఆరబెట్టి తేమశాతం తగ్గించి కేంద్రాలకు తీసుకురావాలని సూచించారు. నాణ్యత ప్రమాణాలు పాటించిన ప్రతి ధాన్యాన్ని కొనుగోలు చేస్తామని హామీ ఇచ్చారు. దళారులకు విక్రయించకుండా ప్రభుత్వ అనుమతి ఉన్న కేంద్రాలలోనే అమ్మాలని రైతులను కోరారు.

కొనుగోలు కేంద్రాలలో రైతులకు ఎలాంటి ఇబ్బందులు కలగకుండా అన్ని మౌలిక సదుపాయాలు కల్పించాలని అధికారులకు సూచించారు. వ్యవసాయ అధికారుల వద్ద ఉన్న వరి కోతల వివరాల ఆధారంగా ధాన్యాన్ని దశల వారీగా కేంద్రాలకు తీసుకురావాలని తెలిపారు.ఈ కార్యక్రమంలో గ్రామ సర్పంచ్ సాగరపు సునీత ప్రసాద్, ఉప సర్పంచ్ కాకి శేఖర్ రెడ్డి, మార్కెట్ కమిటీ సభ్యుడు అబ్దుల్ కరీం, కాంగ్రెస్ పార్టీ నాయకులు ఛత్రు నాయక్, ఏలుగూరి వీరయ్య, పందిరి మల్లేష్, గ్రామ శాఖ అధ్యక్షుడు కోడిదల వెంకన్న, వార్డు సభ్యులు, గ్రామ పెద్దలు, రైతులు తదితరులు పాల్గొన్నారు.