పాఠశాలలో పోక్సో, గుడ్ టచ్ - బ్యాడ్ టచ్‌పై అవగాహన

విద్యార్థులు సమాజంలో పెరుగుతున్న మత్తు పదార్థాల సంస్కృతికి ఆకర్షితులు కాకుండా చదువుపైనే దృష్టి సారించాలని జిల్లా బాలల పరిరక్షణ విభాగం (డీసీపీయూ) సోషల్ వర్కర్ ఎం. మత్స్యగిరి సూచించారు.

​మండలంలోని తంగడపల్లి జెడ్పీహెచ్ఎస్ పాఠశాలలో గురువారం డీసీపీయూ, జస్ట్ రైట్స్ చిల్డ్రన్ & స్కోప్ స్వచ్ఛంద సంస్థల ఆధ్వర్యంలో ‘గుడ్ టచ్ - బ్యాడ్ టచ్’, పోక్సో చట్టాలపై అవగాహన సదస్సు నిర్వహించారు. ఈ సందర్భంగా ఆయన మాట్లాడుతూ, పిల్లలపై లైంగిక వేధింపులు, అత్యాచారాలకు పాల్పడే వారిపై పోక్సో కింద తీవ్ర శిక్షలు ఉంటాయని తెలిపారు. ఆపద సమయాల్లో చైల్డ్ హెల్ప్‌లైన్ 1098 లేదా 112 నంబర్లకు ఫిర్యాదు చేయవచ్చని, వివరాలు గోప్యంగా ఉంచుతామని వివరించారు.

​అనంతరం టోల్ ఫ్రీ నంబర్ల పోస్టర్లను ఆవిష్కరించి, బాల్య వివాహాల నిర్మూలనపై విద్యార్థులతో ప్రతిజ్ఞ చేయించారు. కార్యక్రమంలో ప్రధానోపాధ్యాయురాలు డి. భార్గవి, స్వచ్ఛంద సంస్థ ప్రతినిధి బి. నరసింహరాజు, ఉపాధ్యాయులు పాల్గొన్నారు.