హానర్‌ ల్యాబ్‌ ట్యాంకర్‌ నుంచి లీకేజీ.. జాతీయ రహదారిపై వాహనదారులకు తీవ్ర ఇబ్బందులు.

చిట్యాల: నల్గొండ జిల్లా చిట్యాల మండలం సమీపంలోని హానర్‌ ల్యాబ్‌ నుంచి బయటకు వెళ్లిన ఓ ట్యాంకర్‌ నుంచి ప్రమాదకర రసాయనాలు జాతీయ రహదారిపై చిందడంతో వాహనదారులు, స్థానికులు తీవ్ర ఇబ్బందులు ఎదుర్కొన్నారు. రోడ్డుపై రసాయనాలు పడటంతో పరిసర ప్రాంతాల్లో ఘాటైన వాసన వ్యాపించింది. దీంతో అటుగా ప్రయాణిస్తున్న వాహనదారులు ఇబ్బందులు పడాల్సి వచ్చింది.

ట్యాంకర్‌ నుంచి రసాయనాలు లీకవుతున్నప్పటికీ సంబంధిత అధికారులు, కంపెనీ యాజమాన్యం తగిన భద్రతా చర్యలు చేపట్టకపోవడంపై స్థానికులు ఆందోళన వ్యక్తం చేశారు. ప్రమాదకర రసాయనాల రవాణాలో నిబంధనలు పాటించకపోతే ప్రజల ప్రాణాలకు ముప్పు వాటిల్లే ప్రమాదం ఉందని పేర్కొన్నారు.

తరచూ ఇదే సమస్య..

వెలిమినేడు, చిట్యాల పరిసర ప్రాంతాల్లో రసాయనాలను తరలించే ట్యాంకర్ల కారణంగా గతంలోనూ ఇబ్బందులు ఎదురయ్యాయని స్థానికులు తెలిపారు. రసాయన పరిశ్రమల నుంచి బయటకు వెళ్లే ట్యాంకర్లను అధికారులు నిరంతరం తనిఖీ చేయాలని, రవాణాలో భద్రతా ప్రమాణాలు కఠినంగా అమలు చేయాలని డిమాండ్‌ చేశారు.

రోడ్డుపై రసాయనాలు చిందిన ఘటనపై అధికారులు వెంటనే స్పందించి, లీకేజీకి కారణాలను గుర్తించి బాధ్యులపై చర్యలు తీసుకోవడంతో పాటు భవిష్యత్‌లో ఇలాంటి ఘటనలు పునరావృతం కాకుండా ప్రత్యేక నిఘా ఏర్పాటు చేయాలని స్థానికులు కోరుతున్నారు.