రాఖీ పౌర్ణమి సందర్భంగా సంగారెడ్డి జిల్లా ప్రజలకు జిల్లా ఎస్పీ పరితోష్ పంకజ్, ఐపీఎస్ హృదయపూర్వక రక్షాబంధన్ శుభాకాంక్షలు తెలిపారు. సోదర–సోదరీమణుల మధ్య ప్రేమ, ఆప్యాయత, పరస్పర రక్షణకు రాఖీ పండుగ ప్రతీకగా నిలుస్తుందని అన్నారు. మహిళలు, బాలికల భద్రత కోసం జిల్లాలో పోలీసు శాఖ ప్రత్యేక చర్యలు చేపడుతోందని, రద్దీ ప్రాంతాలు, మార్కెట్లు, బస్టాండ్లలో షీ టీమ్స్‌ నిరంతరం నిఘా కొనసాగిస్తాయని తెలిపారు. మహిళలు, బాలికలను వేధించే వారిపై కఠిన చర్యలు తీసుకుంటామని, ఎవరైనా ఇబ్బందులకు గురిచేసినా లేదా అనుమానాస్పద వ్యక్తులు, కార్యకలాపాలు కనిపించినా షీ టీమ్‌ నంబర్‌ 8712656772కు సమాచారం ఇవ్వాలని సూచించారు. ప్రజలు రాఖీ పౌర్ణమిని ప్రశాంతంగా, సంతోషంగా జరుపుకోవాలని, ప్రతి ఒక్కరూ ట్రాఫిక్‌ నిబంధనలు పాటించాలని ఎస్పీ కోరారు. ద్విచక్ర వాహనదారులు తప్పనిసరిగా హెల్మెట్‌ ధరించాలని, కార్లలో ప్రయాణించే వారు సీట్‌ బెల్ట్‌ పెట్టుకోవాలని సూచించారు. చెల్లి కట్టే రాఖీ నీకు రక్షణ బంధం.. నువ్వు ధరించే హెల్మెట్‌ నీ ప్రాణానికి రక్షణ కవచం. రాఖీ కట్టే చెల్లి కోసం మాత్రమే కాదు.. నీ కుటుంబం కోసం కూడా హెల్మెట్‌ తప్పనిసరిగా ధరించండి అని ఎస్పీ ప్రజలకు సందేశం ఇచ్చారు.