స్థానిక విశాల భారతి హైస్కూల్‌లో గురువారం బోనాల వేడుకలు, శ్రావణ వరలక్ష్మి వ్రత మహోత్సవాన్ని తెలంగాణ సంస్కృతీ సాంప్రదాయాలు ఉట్టిపడేలా అంగరంగ వైభవంగా నిర్వహించారు. వేడుకల్లో భాగంగా విద్యార్థులు సాంప్రదాయ దుస్తులు ధరించి, శివసత్తుల రూపంలో బోనాలతో అలరించారు. మరికొందరు విద్యార్థులు పోతురాజుల వేషధారణతో చేసిన విన్యాసాలు అందరినీ ఆకట్టుకున్నాయి. అనంతరం పాఠశాల ప్రాంగణంలో భక్తిశ్రద్ధలతో బోనాల ఊరేగింపు నిర్వహించారు.​ఈ సందర్భంగా పాఠశాల కరస్పాండెంట్ వీసం చైతన్య క్రాంతి వర్ధన్ రెడ్డి మాట్లాడుతూ... తెలంగాణ రాష్ట్ర పండుగగా గుర్తింపు పొందిన బోనాల ఉత్సవాలు మన సంస్కృతీ సాంప్రదాయాలకు, విశిష్టతకు ప్రతీకగా నిలుస్తాయని కొనియాడారు. విద్యార్థులకు మన ఆచార వ్యవహారాలపై అవగాహన కల్పించేందుకే ఇలాంటి వేడుకలను నిర్వహిస్తున్నట్లు తెలిపారు. అలాగే వరలక్ష్మి వ్రతం యొక్క ప్రాముఖ్యతను, దైవచింతన వల్ల కలిగే శుభ ఫలితాలను విద్యార్థులకు వివరించారు. ​ఈ కార్యక్రమంలో పాఠశాల ప్రిన్సిపల్ ముత్యం శ్రీనివాస్, ఉపాధ్యాయులు, ఉపాధ్యాయినులు, విద్యార్థుల తల్లిదండ్రులు, విద్యార్థినులు పాల్గొన్నారు.