నాగార్జునసాగర్: కంప్యూటర్ రంగంలో నైపుణ్యం సాధిస్తే ప్రపంచ స్థాయి ఉద్యోగాలను సులభంగా పొందవచ్చని నాగార్జున సాగర్ బీసీ గురుకుల డిగ్రీ కళాశాల కంప్యూటర్ సైన్స్ అసిస్టెంట్ ప్రొఫెసర్ డా. బొబ్బిలి రాజా పేర్కొన్నారు.

గురువారం నాగార్జున ప్రభుత్వ కళాశాలలో డిగ్రీ, పీజీ విద్యార్థుల కోసం కంప్యూటర్ సైన్స్ విభాగం ఆధ్వర్యంలో “కంప్యూటర్ సైన్స్ రంగంలో ఉద్యోగ అన్వేషణ మరియు అభివృద్ధి చెందుతున్న అవకాశాలు” అనే అంశంపై విస్తృత ఉపన్యాసం నిర్వహించారు.

ఈ సందర్భంగా డా. బొబ్బిలి రాజా మాట్లాడుతూ కంప్యూటర్ సైన్స్‌లో నైపుణ్యం కలిగిన వారికి ప్రపంచవ్యాప్తంగా మంచి అవకాశాలు ఉన్నాయని తెలిపారు. ముఖ్యంగా ఆర్టిఫిషియల్ ఇంటెలిజెన్స్ (AI), మిషన్ లెర్నింగ్ (ML), సైబర్ సెక్యూరిటీ వంటి విభాగాల్లో విస్తృతంగా ఉద్యోగాలు లభిస్తున్నాయని వివరించారు. ఆధునిక సాంకేతిక పరిజ్ఞానాన్ని అలవాటు చేసుకుని విద్యార్థులు ముందుకు సాగాలని సూచించారు.

అదేవిధంగా ఉన్నత విద్యపై ఆసక్తి ఉన్న విద్యార్థులకు తగిన మార్గదర్శకత్వం అందించారు.

కళాశాల ప్రిన్సిపాల్ ప్రొఫెసర్ సముద్రాలు ఉపేందర్ మాట్లాడుతూ ఈ కార్యక్రమం ద్వారా విద్యార్థుల్లో ఆధునిక సాంకేతిక రంగాలపై అవగాహన పెంపొందించడం, కెరీర్ ఎంపికలో స్పష్టత కల్పించడం లక్ష్యమని తెలిపారు.

ఈ కార్యక్రమంలో విభాగాధిపతి వెంకటరమణ, వైస్ ప్రిన్సిపాల్ డా. పి. రవికుమార్, ప్రొఫెసర్ అంతటి శ్రీనివాసులు, సి.ఓ.ఈ డా. డి. మునిస్వామి, అకాడమిక్ కోఆర్డినేటర్ బి. నాగరాజు, అధ్యాపకులు, విద్యార్థులు పాల్గొన్నారు.