నారాయణఖేడ్ పట్టణంలోని సాయి బాబా ఫంక్షన్ హాల్‌లో మానూర్ మండలంలోని శేల్గీర గ్రామానికి చెందిన శ్రీ హన్మా రెడ్డి ఉద్యోగ విరమణ అభినందన సభ ఘనంగా నిర్వహించబడింది. ఈ కార్యక్రమానికి ముఖ్య అతిథిగా హాజరైన మున్సిపల్ చైర్మన్ నాగేష్ కుమార్ షేట్కార్ మాట్లాడుతూ, హన్మా రెడ్డి గారు తమ ఉద్యోగ జీవితమంతా నిజాయితీ, క్రమశిక్షణ, నిబద్ధతతో ప్రజలకు, ప్రభుత్వానికి సేవలందించి ఎలాంటి మచ్చ లేకుండా పదవీ విరమణ చేయడం అభినందనీయమని అన్నారు. ఆయన సేవా తత్వం, కర్తవ్యనిష్ఠ, సహోద్యోగులతో కొనసాగించిన సత్సంబంధాలు అందరికీ ఆదర్శప్రాయమని కొనియాడారు. ఉద్యోగ విరమణ అనేది ఉద్యోగ బాధ్యతల నుంచి మాత్రమేనని, సమాజానికి వారి అనుభవం, మార్గదర్శకత్వం ఎల్లప్పుడూ అవసరమని పేర్కొన్నారు. అలాగే హన్మా రెడ్డి కుటుంబంతో తమ కుటుంబానికి ఉన్న ఆత్మీయ అనుబంధాన్ని గుర్తు చేసుకుంటూ, పదవీ విరమణ అనంతరం కుటుంబ సభ్యులు, బంధుమిత్రులతో కలిసి ఆయురారోగ్యాలతో, సుఖసంతోషాలతో జీవించాలని ఆకాంక్షించారు. అనంతరం ఆయనను శాలువాతో ఘనంగా సత్కరించి శుభాకాంక్షలు తెలిపారు. ఈ కార్యక్రమంలో నాగల్గిద్దా మండల కాంగ్రెస్ పార్టీ అధ్యక్షులు మాణిక్‌రావు పటేల్, మున్సిపల్ కౌన్సిలర్ వివేకానంద మహేందర్, అంజిరెడ్డి, శేరికర్ నందు, వాహేద్, శేల్గీర గ్రామ ప్రముఖులు, మానూర్ మండల నాయకులు, ప్రజాప్రతినిధులు, కుటుంబ సభ్యులు, ఉపాధ్యాయులు, విద్యార్థులు మరియు పెద్ద సంఖ్యలో ప్రజలు పాల్గొని హన్మా రెడ్డి గారిని ఘనంగా సన్మానించారు.