సంగారెడ్డి పట్టణంలోని పీఎస్‌ఆర్ గార్డెన్‌లో కల్కి భగవాన్ భక్త బృందం ఆధ్వర్యంలో నిర్వహించిన కల్కి భగవాన్ కల్యాణ మహోత్సవంలో టీపీసీసీ వర్కింగ్ ప్రెసిడెంట్ జగ్గారెడ్డి పాల్గొని కల్కి భగవాన్ దంపతుల విగ్రహాలకు పూలమాలలు సమర్పించి ప్రత్యేక పూజలు నిర్వహించారు. ఈ సందర్భంగా ఆయన మాట్లాడుతూ కల్కి భగవాన్ కృపాకటాక్షాలు ప్రజలందరిపై ఉండాలని, ప్రతి కుటుంబం సుఖశాంతులు, ఆయురారోగ్యాలతో వర్ధిల్లాలని ఆకాంక్షించారు. ప్రతి ఏడాది భక్తిశ్రద్ధలతో ఈ కార్యక్రమాన్ని నిర్వహిస్తున్న కల్కి భగవాన్ భక్త బృందాన్ని అభినందించారు. ఆలయ నిర్మాణం కోసం స్థలాన్ని సేకరించి ఏర్పాట్లు చేస్తున్నామని నిర్వాహకులు తెలియజేయగా, ఆలయ నిర్మాణానికి తన వంతు పూర్తి సహకారం అందిస్తానని జగ్గారెడ్డి హామీ ఇచ్చారు. ఈ కార్యక్రమంలో టీపీసీసీ ప్రధాన కార్యదర్శి తోపాజి అనంత్ కిషన్, కల్కి భక్త బృంద సభ్యులు సత్యనారాయణతో పాటు పలువురు భక్తులు, నాయకులు పాల్గొన్నారు.