కాంగ్రెస్ పార్టీ అనుబంధ విభాగమైన సేవాదళ్ పార్టీకి వెన్నెముకలాంటిదని, క్షేత్రస్థాయిలో పార్టీ బలోపేతం మరియు ప్రభుత్వ సంక్షేమ పథకాలను ప్రజల్లోకి తీసుకెళ్లడంలో సేవాదళ్ కార్యకర్తలు కీలక పాత్ర పోషిస్తున్నారని టీజీఐఐసీ చైర్‌పర్సన్ నిర్మలా జగ్గారెడ్డి అన్నారు. మంగళవారం నాంపల్లి ఎగ్జిబిషన్ మైదానంలో కాంగ్రెస్ సేవాదళ్ ఆధ్వర్యంలో నిర్వహించిన “సమర్థ శిక్షణ శిబిరం”లో టీపీసీసీ అధ్యక్షుడు మహేష్ కుమార్ గౌడ్‌తో కలిసి ఆమె పాల్గొన్నారు. ఈ సందర్భంగా టీపీసీసీ అధ్యక్షుడు మహేష్ కుమార్ గౌడ్ జ్యోతి ప్రజ్వలన చేసి కార్యక్రమాన్ని ప్రారంభించి మాట్లాడుతూ ప్రభుత్వ సంక్షేమ పథకాలను ప్రజల్లోకి తీసుకెళ్లడంలో సేవాదళ్ కార్యకర్తలు కీలక పాత్ర పోషించాలని పిలుపునిచ్చారు. పార్టీ విధివిధానాలు, క్రమశిక్షణ, సేవా దృక్పథంపై ప్రతినిధులకు ప్రత్యేక శిక్షణ ఇవ్వడం ద్వారా రాబోయే రాజకీయ సవాళ్లను ఎదుర్కోవడానికి సంస్థాగత బలోపేతం సాధ్యమవుతుందని అన్నారు. నిర్మలా జగ్గారెడ్డి మాట్లాడుతూ కాంగ్రెస్ ప్రభుత్వం అమలు చేస్తున్న ప్రజాహిత కార్యక్రమాలను ప్రజల్లోకి తీసుకెళ్లడంలో సేవాదళ్ ఎల్లప్పుడూ ముందుండాలని కోరారు. ఈ శిబిరంలో క్షేత్రస్థాయిలో నాయకత్వ లక్షణాల పెంపు, ప్రజలతో మమేకం కావడం, పార్టీ నిర్మాణ బలోపేతంపై దిశానిర్దేశం చేశారు. ఈ కార్యక్రమంలో సేవాదళ్ రాష్ట్ర అధ్యక్షులు, పలువురు సీనియర్ నాయకులు మరియు రాష్ట్రవ్యాప్తంగా వచ్చిన వందలాది మంది సేవాదళ్ కార్యకర్తలు పాల్గొన్నారు.